MOKABAT ngadto sa 14 ka mga tawo, lakip na ang kanhi bise mayor nadakpan sa ronda sa usa ka buwangan sa lungsod sa Tubigon diin giingong nakaingon sa pagkasamad sa pipila ka mga nanan-aw kinsa nisuway pag-ikyas niadtong Lunes.
Sigun ni PLT. Col. Jomar Pomerejos, hepe sa Provincial Intelligence Unit (PIU) sa Bohol Provincial Police Office (BPPO), ang cockfighting event nga gihimo sa Tubigon Cockpit nakalapas sa Presidential Decree No. 449, ang balaud nga nagdili sa illegal nga sabong.
Lakip sa gidakop mao si kanhi bise mayor Virgilio Fortich, kinsa gikatahong maoy promoter sa maong kalihokan.
Matud ni Pomarejos nga ang maong sabong usa ka ilegal gumikan kay gihimo kini og Lunes ug nakalapas sa PD 449 nga nag-ingon nga ang paghimo sa maong kalihokan iatol sa mga adlaw’ng Dominggo ug “legal holidays.”
“Naay gitawag na legal holiday pero dili mana nato masud ang January 2. So it cannot be qualified kay kanang January 2, hindi naman siya holiday per se,” butyag ni Pomerejos.
Apan si Tubigon Mayor William Jao wala kauyon niíni kay ang mga organizers dili na magkinahanglabn og permit aron himuon ang kalihokan kay gihimo kini sa Enero 2 nga gideklarar na ni Presidente Ferdinand Marcos, Jr. isip usa ka additional special (non-working) day.
Si Jao, kinsa kabahin sa Tubigon United Cockpit Corporation (Tucic) ug maoy nanag-iya sa cockpit arena, nidugang nga ang pasilidades adunay lisensiya nga mo-operate.
Base sa Administrative Code of 1987, nga giamendar sa Republic Act 9492, ang mgq listahan sa “Regular Holidays and Nationwide Special Days” mahimong i- modify sa balaud, order o proclamation.
Sa kaso sa January 2, 2023, gideklarar kini ni Marcos isip usa ka special (non-working) day pinaagi sa Proclamation No. 90 nga giisyo niadtong Nobiyembre sa milabay’ng tuig.
Gikasagmuyo usab sa mayor ang pamaagi kabahin sa gihimong ronda.
Nibutyag si Jao nga ang kalit nga pag-abot sa mga sakop sa PIU nakahatag og kahadlok ngadto sa pipila ka mga tawo sud sa buwangan. Diin uban kanila giingong nangambak gikan sa bongbong ug nahiagom og mga samad gikan sa barbed wires ug buak nga mga botelya.
“Naay usa ka police na niambak sa galeriya pero nganong ngana man na naa may pultahan. Pwede man untang estoryahon lang ang management na ipaundang. Ngano pakuratan man na di mana shabu. Kanang sabong ig-agaw ra na sa tongits ug mahjong ba kaha,” butyag ni Jao.
Sigun ni Pomerajos, nga ílang gikasubo ang pipila ka mga nasamdan nga padung moikyas kay wa sila’y tumong nga dunay mapasakitan.
“We have no intention na naay ma hurt pero kami amo lang gi follow unsay standard operating procedure. Naa pud miy video ani na operation in compliance sa among directive,” matud pa niya.
Dugang ni Pomarejos nga ang prosecutor o ang korte nay mohukom kun ang wa mauyoni sa mayor insakto ba kabahin sa kahulogan sa legal holiday.
“Kung naa tay mga complaints didto nalang siguro sa korte ang ilang contention kay klaro mana siya sa PD 449 kay kami amo lang gipatupad ang direktiba sa amoa from the DILG and kadagkuan namo sa PNP. Dili lang ni sa Bohol, tibuok nasud ni na mando,” siya nagkanayon. (AND)
