TULO ka mga tawo ang nangaangol, usa niíni kritikal, human aksidenteng nabanggaan og usa Sports Utility Vehicle kun SUV sa Provincial Road sa Purok 4, Brgy. Triple Union, lungsod sa Catigbian mga alas 9 sa buntag kagahapon.
Ang mga biktima giila nga sila si Abundia Palingcod y Gonzaga, 75 anyos, minyo, bana niíni nga si Crispin Palingcod, 77, pulos molupyo sa Purok 5, Brgy. Kang-iras, Catigbian ug Ramir Cabanig y Adlawan, 45, minyo, tag-iya og motorcycle shop, molupyo sa Purok 4, Brgy. Triple Union, Catigbian.
Ang drayber nga nagkabangga nailhan nga si Perla Delan y Justol, 55, minyo, Brgy. Bool, siyudad sa Tagbilaran.
Sigun ni PMSG Jude Dumadag sa Catigbian Municipal Police Station nga samtang ang magtiayong senior citizen naglingkod sa duol sa shop ni Cabanig kay nag-atang og sakyanan. Dihang usa ka Toyota Avanza kolor Silver Metallic, may plate number GAR-4321 nga nagdagan gikan sa siyudad sa Tagbilaran padung sa direksiyon sa lungsod sa Sagbayan, kalit lamang nisimang sa karsada ug nabanggaan ang magtiayong senior citizen ug giingong naguyod og lima ka dupa. Si Cabanig kinsa dunay giayo nga motorsikllo sa íyang shop, lakip usab nga nabanggaan.
“Matud sa drayber (Delan) nga naay gikuot sa iyang bag samtang nag-drive, nisimang ug wa siya makabantay nga naay nahagip, ” butyag ni Dumadag nga nahinabi sa BBDN ug sa Bee Sunrise News.
Nibutyag si Dumadag nga gitabangan sa mga molupyo og dayong ang Toyota Avanza aron makuha ang mga biktima nga nailawman sa maong sakyanan.
Gidala ang mga biktima sa Ramiro Community Hospital ug gikatahong anaa sa kritikal nga kahimtang si Crispino ug anaa sa intensive care unit kun ICU. Samtang ang duha mga out-patient na.
Gikatahong motambong unta og kasal si Delan didto sa Sagbayan ug may nagdala kini og regalo. Apan wa na kini madayon tungod sa disgrasya.
Dugang sa maong imbestigador nga nagpasalig hinuon si Delan nga maoy mangabaga sa galastuhan sa tambalanan hinungdan nga wala na gikustodiya sa kapolisan. (ALAN ANDY NALZARO DALAGAN with Sonic Galacio)
