MOKABAT ngadto sa unom ka mga sakyanan ang aksidenteng nagkabangga human usa ka six wheeler dump truck aksidenteng nitapsing sa giobertikan nga motorsikllo dayong nidasmag sa naghunong nga kotse nga nidusmog sa laing tulo ka sakyanan sa gi-repair nga karsada sa nasudnong dalan didto sa Brgy. Western Poblacion, lungsod sa Alburquerque lapas sa alas 12 sa kaudtohon kagahapon.
Si Police Executive Master Sergeant Dominador Ungab sa Alburquerque Municipal Police Station nagbutyag nga samtang usa ka Fuso Canter mini dump truck nga may plaka GKP-554 nga nakarehistro sa tag-iya nga sila si Conchita Caberte ug Erlinda Anino, pulos taga Brgy. Agape, Loboc ug gimanehoan ni Tommy Labuan, 43 anyos, may live-in partner, molupyo usab sa Brgy. Agape, lungsod sa Loboc, nagdagan padung sa lungsod sa Loay. Dihang pag-abot sa maong dapit, niobertik sa gisundan nga Honda XRM 125 nga motorsikllo nga gimanehoan ni Jonathan Alesna, 46, minyo, taga Purok 6, Brgy. Eastern Poblacion, Alburquerque. Apan giingong nimenor ang maong motorsiklo gumikan kay daghang naghunong nga mga sakyanan kay may gitrabaho nga porsiyon sa karsada sa maong dapit.
“Matud sa drayber, gasunod kini sa motorsiklo ug niobertik, wa siya makabantay nga may naghunong nga mga sakyanan kay didto kini ga- focus sa motor, ” butyag ni Ungab.
Natapsungan sa maong dump truck ang giobertikan nga motorsikllo dayong nidasmag sa nagparking nga Suzuki Cioz nga gimanehoan ni Stephen John Librea, 24, ulitawo, taga Brgy. Catarman, Dauis. Gumikan niini, natulak ang maong awto ug nibangga sa gisundan nga Toyota Hilux pick up nga gimanehoan ni Christian Ronnie Parnada, 39, minyo, taga Consolacion, Cebu nga nidasmag usab sa gisundan nga Suzuki multicab nga gimanehoan ni Klaus Max Paul Dinges, 72, minyo, usa ka German national nga nagpuyo ss Upper Sta. Fe, Albur nga nidusmog usab sa
Honda City nga gimanehoan ni Alfredo Varquez, 77, biyudo, taga Poblacion Sawang, Loboc.
Matud ni Ungab nga nakalingkawas ang drayber sa motorsikllo samtang way nangaunsa sa mga sakay sa laing upat ka nga sakyanan.
Nangadanyos ang mga sampot sa maong mga sakyanan lakip na sa motorsikllo.
Dugang ni Ungab nga nagpirmahay ang nakabanggang drayber ug sa nabanggaan niíni nga maoy mangabaga sa galastuhan sa mga danyos niini. (ALAN ANDY NALZARO DALAGAN)
