MOKABAT ngadto sa unom ka mga pamilya ang gipabakwit sa mga otoridad gumikan sa hulga sa landslide didto sa Brgy. Cambane, lungsod sa Candijay atol sa dakong bunok sa uwan niadtong Sabado.
Kini maoy gibutyag ni PCpl Salvador Dealagdon Jr. sa Candijay Municipal Police Station nga nahinabi sa BBDN ug BSN.
Matud ni Dealagdon nga ang Brgy. Cambane nga dunay gilay-on nga pito hangtud walo ka kilometro gikan sa Poblacion, Candijay, usa ka mountainous nga lugar sa maong lungsod ug prone kini sa landslide. Gumikan kay nakasinati na kini og pagdahili sa yuta.
“Basta ing-ani nga panahon nga may low pressure area, automatic na ang evacuation kay prone ng lugara sa landslide, ” butyag ni Dealagdon.
Ang ginsakpan sa Candijay Municipal Disaster and Risk Reduction and Management Office CMDRRMO uban sa mga personahe sa Candijay PNP maoy nagpahilona sa unom ka pamilya nga gilangkoban sa 16 ka mga indibiduwal didto sa Tambongan National High School.
Matud ni Dealagdon nga nanguli na sa ilang tagsa-tagsa ka mga pinuy-anan ang maong mga pamilya kagahapon sa buntag.
Dugang niya nga wa hinuoy nahitabong landslide sa maong dapit. (ALAN ANDY NALZARO DALAGAN)
