|
Tinuod nga kon anaay maayong lider ang usa ka barangay, lungsod, distrito, probinsya o nasud, molambo ug mo-uswag gayud kini.
|
Ang katawhan ilabina na karong panahona, angay nga kanunay pahinumduman sa ilang dakong papel sa katilingban — maoy sinugdanan sa kausaban.
Ang kalambuan nga magsugod sa kausaban sa panghunahuna sa katawhan kon kini gusto og kaayuhan ilabina sa komunidad, kwentahon daan ang matag desisyon.
Diha sa pagpili og mga lider, responsable ang katawhan kon unsay sangputan sa klase sa pang-gobyerno sa ilang gipiyalan sa gahum.
Ang mentalidad karon sa katawhan ana-a nagatutok sa kon kinsa ang anaay dakong kuwarta panahon sa Eleksyon.
Hinuon dili man tanan pero maoy kasagarang nawong kon mamili na sa mosunod nga mga lider.
Dinhi sa Bohol, ang makabungog nga kadaugan ni Gob. Aris Aumentado nagsukad sa mga tawo nga nagpakabana nga tarungon ang pang-gobyerno sa probinsya ilabina sa Kapitolyo.
Ug aron mobalik ang gahum ug tingog sa katawhan nga maoy tinuod nga gobyerno, reporma sa kaugalingon ang gikinahanglan aron makabaton og tarong ug epektibo nga liderato.
