Posible nga unom ngadto sa siyam ka bagyo ang masinati sa nasud sa nahibiling panahon ning tuig.
Matud pa ni Administrator Vicente Malano sa Philippine Atmospheric, Geophysical, and Astronomical Services Administration (PAGASA), duha ngadto sa upat ka bagyo ang naghulga ning buwan sa Oktubre.
Dugang pa niya, duha ngadto sa tulo ang atangan sa Nobyembre ug dunay duha nga posibleng moabut sa Disyembre.
Si Malano nagkanayon nga ang PAGASA naningkamot sa paglusad ug kampany aron makapangandam ang katawhan sa mga gikahadlukan nga mga katalagman.
Iyang giawhag ang katawhan nga mosunod sa mga pahimangno sa PAGASA ingon man magtuon sa mga pinulongan kabahin niini.
“Kung mopasidaan ang PAGASA, kinahanglang tumanon kini. Usahay, magtuo ang katawhan nga hinay ra kini,” dugang pa niya.
Iyang gipahinumdum nga ang bagyong “Ondoy” hinay ra ang hangin apan kini maoy hinungdan sa husog nga uwan.
Tulo na ka kusog nga bagyo ang nasinati sa nasud karong tuiga. Ang labing ulahi mao ang “Karding” nga nagbilin ug dakung kadaut gawas sa labing menos 11 ka tawo nga nakalas ang kinabuhi.
