U |
sa nalang ka pirma ang gikinahanglan ug mahuman na ang lantugi kon mahinayon ba o dili ang Barangay ug Sangguniang Kabataan Election (BSKE) karong Disyembre 2022.
Pirma nalang ni President Ferdinand Marcos ang gikinahanglan ug mahingpit na’ng usa ka balaud ang balaudnon nga gipasar sa Senado ug sa Ubos Balay Balauranan. Posible karong semanaha o kaha sunod semana pirmahan na kini. Wa pay siguro nga samtang gisuwat kining atong lindog nipirma na ang Presidente.
Ang mga orihinal nga plano nga iuswag sa Disyembre 2023, dili na dihang gihimo ang Bicameral Committee kun panagtagbo sa Senado ug House of Representatives. Nahiusahan nga usbon kini ngadto sa katapusang Lunes sa Oktubre, 2023, duha ka buwan nga mas sayo sa unang Lunes sa Disyembre 2023. Ang paglingkod sa bag-ong napili nga mga opisyales sa barangay ug Sangguniang Kabataan, magsugod sa Nobiyembre 30, 2023.
Mao kini ang unod sa balaudnon nga gihandus sa lamesa sa Presidente aron pirmahan ug mamahimong hul-os nga balaud. Ang makapugong nalang mao ang pag-usab sa huna-huna sa Presidente ug iya kining i-veto kun supakon ug dili pirmahan samtang mosugyot sa kausaban.
Apan, lisod nang isibog ang pirma sa presidente sanglit iyang mga kaabin ang mga nagsugyot niini. Gawas pa, usa siya sa nisaad nga iuswag ang piniliay panahon sa iyang kampanya.
Ang gisugyot nga balaud nga i-uswag ang BSKE, nagsaad usab nga tulo lamang ka tuig ang termino sa mga barangay officials human sa election. Nga sa ato pa, human sa piniliay sa katapusang Lunes sa Oktobre 2023, ang sunod nga piniliay himoon sa katapusang lunes sa Oktobre 2026.
Pero nasayod kita nga sayon lang usab-usabon ang piniliay sa barangay depende sa panghuna-huna ug kagustohan sa mga naglingkod sa Kongreso ug sa Malakanyang. Dili kita magdahum nga masunod kini dayon.
Taas taas na ang mga tuig sa paglingkod sa mga kasamtangang opisyales sa barangay ug Sangguniang Kabataan, mokapin na sa lima ka tuig ang ilang serbisyo. Hapit duha ka termino sa tag 3 ka tuig nga termino.
Nanggungis na ang mga SK, samtang naniguwang na usab ang mga opisyales sa barangay.
Kon ako ang pakwentahon, sobra na kining mga tuiga alang sa panerbisyo sa barangay. Unsa pa bay dugayan? Gawas lang kon gihimong gatasan ang barangay ug gihimong panginabuhian sa mga opisyales sa barangay ang ilang serbisyo.
Pero alang sa mga tarong, dili kini paigo nga mga tuig, ilabi na nga napalyar ang ilang panerbisyo niadtong mga tuig sa pandemiya.
Ang ato lamang niini karon, mao ang paghuwat sa pirma sa presidente, ug mangandam alang sa laing bugno sa politika nga nagdugang og bahin-bahin sa mga tawo.
![](https://i0.wp.com/boholbalita.com/wp-content/uploads/2022/08/297250573_5616130511770268_6935859902824866874_n-scaled.jpg?fit=1024%2C450&ssl=1)