TAGBILARAN CITY, Bohol, October 5 (PIA)–Gipahayag sa Department of Health (DOH) adlaw’ng Martes nga kinahanglan niining mohatag sa unang COVID-19 booster doses sa gibanabanang 3.6 milyong Pilipino aron makab-ot ang target niining kampanya sa PinasLakas nga mapakusog ang 30% sa eligible nga populasyon sulod sa unang 100 ka adlaw sa administrasyong Marcos.
Sa usa ka media briefing, gibutyag ni DOH officer-in-charge Maria Rosario Vergeire nga dili moubos sa 3.2 milyong indibidwal ang nabakunahan sa unang booster shot ubos sa kampanya sa gobyerno sa PinasLakas sa pagkakaron.
Gidala niini ang gihugpong nga booster tally sa 19.7 milyong indibidwal, nga katumbas sa gibanabanang 25% sa takus nga populasyon.
Aron makab-ot ang katuyoan sa gobyerno nga mapakusog ang 30% sa target nga populasyon sa Oktubre 8, o ang ika-100 nga adlaw sa pangatungdanan ni Pangulong Ferdinand “Bongbong” Marcos Jr., miingon si Vergeire nga kinahanglan pa nilang hingosgan ang pagbakuna sa dugang 3.6 milyong indibidwal.
“We said that we have recalibrated and we will try to achieve 30% by October 8. Sa ngayon, we still lack around 5%, which is equated to around 3.6 million that we still need to cover for us to reach the 30%,” matud pa ni Vergeire.
Dugang pa, miingon si Vergeire nga nabakunahan usab nila ang kapin sa 42,000 senior citizen og primary vaccine series ubos sa kampanya sa PinasLakas.
Gibanabanang 6.8 milyon o 78.5% sa takus nga populasyon sa A2 ang hingpit na karong nabakunahan batok sa COVID-19.
Gilusad sa DOH ang PinasLakas niadtong Hulyo, nga unang nagtinguhang maghatag og mga booster shot sa 50% nga angayang populasyon sa nasud sulod sa unang 100 ka adlaw sa administrasyong Marcos. (ecb/PIA7-Bohol)
