Opisyal na’ng ma-postpone ang Barangay ug Sangguniang Kabataan Election imbes karong Disyembre ngadto na sa Oktubre 2023 kun sunod tuig, human gipirmahan ni President Ferdinand “Bongbong” Marcos ang balaud kaniadtong Lunes.
Ang Republic Act 11935 nga naglatid sa pag-uswag na usab sa petsa sa eleksyon sa Barangay ug Sangguniang Kabataan sa katapusang Lunes sa Oktobre 2023, napirmahan na ni President Marcos sa nakalabay nga Lunes Oktobre 10.
Matod pa sa bag-ong balaud, ang tanang incumbent nga barangay ug SK officials kinahanglan moserbisyo ug magpabilin sa ilang katungdanan hangtod aduna nay mapiling bag-ong opisyal gawas lang kon sila tangtangon o kaha masuspenso.
Ang termino sa mga bag-ong mapiling barangay ug SK officials magsugod sa ilang katungdanan sa Nobiyembre 30, 2023. Samtang sila magserbisyo sa termino sud sa tulo ka tuig.
Kini ang ikaupat nga pagka-postpone sa barangay election sukad sa tuig 2016, ang unang tulo ka postponement nahitabo ilawom sa pamunoan ni kanhi Presidente Rodrigo Duterte.
Si Comelec Chairperson George Erwin Garcia niingon nga sila mosunod sa balaud. Matod niya, ang pagka-postpone magtugot sa Comelec nga ipadayon ang voter registration aron masiguro nga mas daghan ang makaapil sa pagbansay sa ilang katungod sa pagpili.
Dugang ni Garcia nga magpagawas sila og pahibawo sa pag-adjust sa calendar of activities sa mas daling panahon ug ipahiluna ang mga naka-planong mga kontrata sa pagpahigayon unta sa piniliay karong Disyembre.
Si Senator Imee Marcos kinsa maoy nag-sponsor sa balaudnon didto sa Senado niingon nga ang pag-uswag sa eleksiyon maghatag kanilag dugang panahon aron maplantsa ang mga reporma nga iyang gisugyot lakip na ang pag-extend sa term of office sa mga barangay officials gikan sa tulo ngadto sa unom ka tuig.
Pipila ka mga magbabalaud nilantugi nga ang gobiyerno makagamit sa P8.4 nga pundo gikan sa Comelec ngadto sa pagtubag sa problema sa pandemic.
Apan giklaro sa Comelec nga aduna kini fiscal autonomy nga buot ipasabot nga ang pundong gihatag na sa ilang ahensiya dili na mahibalik pa sa executive department bisan pa man kon gipostpone ang eleksiyon.
Nagtuo ang ubang magbabalaud nga ang pagpostpone makaayo sa nasud nga nagkabahin-bahin tungod sa presidential election.
Ang uban wala modaginot sa maoy ideya samtang giinsister nga ang panahon insakto na alang sa bag-o og preskong mandato sa kabarangay ug kabataan sa tibouk nasud.
Ang paglangay sa piniliay sa barangay ngadto sa sunod tuig makadugang og laing P10 bilyones matod pa ni Comelec Chairman Garcia.
Apan si House Speaker Martin Romualdez niingon nga ang pangihanglang budget sa Comelec tungod sa pagka postpone sayon rang atubangon.
Ang Comelec, nagsugod na unta sa pagpatik sa mga balota alang sa barangay polls, apan nipasabot kini nga dili malabay ang mga materyales tungod kay pwede pa kining gamiton. (jgo)
