Si Gob. Aris Aumentado nanumpa isip chairman sa Regional Develoment Council (RDC) sa rehiyon 7 nga gilangkoban sa mga lalawigan sa Bohol, Sugbu, Negros Oriental ug Siquijor gahapon (Nov. 21).
Ang gobernador nanumpa atubangan ni Judge Jennifer Chavez-Marcos sa Regional Trial Court sa Tagbilaran City human sa tigum sa executive committee sa Provincial Development Council (PDC) nga gihimo sa New Capitol, ning syudad.
Si Aumentado gitudlo ni Ferdinand Marcos, Jr. nga pangulo ug si Kenneth Cobonpue, co-chairman sa private sector, sa RDC sa niaging buwan. Tungod niini, siya nagpasalamat sa Presidente.
“In return for the trust and confidence afforded to me, rest assured that I am 100% committed to this responsibility, directing Central Visayas towards becoming an even more progressive and united region against the backdrop of the COVID-19 pandemic and devastaations of super typhoon Odette,” matud ni Aumentado sa iyang speech human sa pagpanumpa niya.
Matud sa gobernador nga siya nanawagan sa iyag partners sa RDC, sama sa local chief executives, sa mga opisyal sa mga probinsya, sa mga congressman, barangay officials, nationa agencies ug sa pribadong sector, media ug ubang sector sa pagtimbayayong ug suporta alang niining dakong tahas nga gisangon kaniya.
Kon kahinumduman, ang kanhi amahan ni Aris, kanhi Gobenador Erico Boyles Aumentado nahimo nga RDC chairman ug gibuhos niini ang tanan alang sa pagkab-ot sa mga tumong sa RDC.
Sa wala pa siya nanumpa, si Aris midumala sa executive committee sa Provincial Development Council (PDC).
Ang iyang pagpanumpa gitambongan ni Bise-Gob. Victor Balite, mga board members, hepe sa mga opisina, mga mayor, NGOs, media gikan sa kaulohan ug Cebu ug Bohol, ug uban pa. (rvo)
