TAGBILARAN CITY, Bohol, January 19 (PIA)–Kinahanglan pa gihapon ang pagsuot og face mask bisan ideklara na sa World Health Organization (WHO) ang pagtapos sa global health emergency tungod sa COVID-19.
Dungan sa pagpresentar sa updated guidelines sa WHO sa COVID-19, gitumbok pa gihapon ni Infectious diseases expert Dr. Rontgene Solante ang kamahinungdanon sa pagsuot og face mask sa community settings.
“Wala pa rin tayong sinasabi na wala na tayong COVID. Magli-lift man ang public health emergency, it is because manageable na ang mga kaso, hindi na napupuno ang mga hospitals, at marami na rin ang nabakunahan. But, nandito pa rin ang COVID sa community,” matud pa ni Solante sa Laging Handa Public Briefing.
Gipahinumdom niini nga ang face mask usa ka importanteng instrumento aron dili magtakod-takod ug dili makakuha sa infection.
Sa pagkakaron, boluntaryo na lamang ang pagsuot og face mask sa indoor ug outdoor settings base sa gipagawas nga executive order sa Malacañang sa niaging tuig.
Taliwala niini, base sa gipagawas nga updated COVID-19 guidelines, girekomenda sa WHO ang padayon nga pagsuot og face masks partikular na ang mga exposed sa COVID-19, suspected COVID-19 patient ug mga high risk.
Gawas niini, girekomenda usab sa WHO ang reduced isolation period alang sa mga pasyenteng may COVID.
Gitakdang magpulong ang WHO Emergency Committee sa Enero 27aron ikonsidera kun angay pa bang tawgong global emergency ang COVID-19.
Samtang gi-anunsyo niadtong Martes, Enero 17 ni Department of Health (DOH) officer-in-charge Maria Rosario Vergeire nga andam ang Pilipinas kun i-anunsyo na sa WHO ang pagtapos sa global health emergency sa maong sakit. (ecb/PIA7-Bohol)
