|
Si Gob. Aris Aumentado maoy tinuod nga nihatag og hustisya sa “Buhat ang Pasultihon”. |
Si Aris sa iyang pakigpulong atol sa iyang unang 100 diyas sa pag-alagad sa katawhang Bol-anon niingon nga maningkamot nga matuman gayud ang iyang gisaad nga “Limpyong Panggobyerno ug Unahon ang Bol-anon”.
“Nagpadayon kita sa nasugdan na sa atong Kagamhanang Probinsyal ug ang mga plano ug mga lakang para sa mosunod nga mga adlaw,” matud sa gobernador.
“Buhaton nato ang tanan para sa atong mga damgo alang sa usa ka Bohol nga atong mapasigarbo,” saad ni Gob. Aris.
Ang makabilib kaayo niyang mga nahimo sa Bohol sa una pa lang niyang 100 ka adlaw sa Kapitolyo, maoy buhing-saksi nga gituman na sa anak nga Aumentado ang iyang gisaad panahon sa kampanya.
Ang naghatag og “highlight” sa maong unang 100 ka adlaw isip amahan sa probinsya mao ang pagkatukod sa OGAR nga mosusi sa mga transaksyon sa niagi ug kasamtangang administrasyon.
Ikaduha sa listahan mao ang pagsulod sa mga dagkong negosyante sa kaulohan dinhi sa lalawigan.
Laing mga kalambuan mao ang turismo, pag-us-os sa kreminalidad ug ang mga nauna ng lakang sa nagkadaiyang sektor sama sa agrikultura, imprastraktura, edukasyon, panginabuhian ug uban pa.
Ni-abante na og sugod ang Bohol. Ug sa gipakita ni Aris, mas mo-abante pa kini paglatas sa katuigan.
Ang pag-abante karon sa Bohol usa ka pananglitan nga sa seryoso, sinsero ug hayag nga pagpangalagad makita ang tinuod nga kalambuan ug kauswagan. Ug dili sa tanang higayon, mas makamao lamang ang giilang mga utokan ug eksperto, kay si Aris yano apan ekstra-ordinaryo sa nataran sa pagpanerbisyo.
