SAN MIGUEL, Bohol — USA ka ALS graduate nakuhaan og giingong mga ilegal nga drugas nadakpan atol sa usa ka buy-bust operation nga gihimo sa San Miguel Police Station sa Purok 4, Brgy. Mahayag niining maong lungsod, alas 3:35 sa hapon, Enero 26, 2023.
Ang suspetsado mao si Christopher Sarte y Atuel, 21 anyos, residente sa Purok 6, Brgy. Mahayag, San Miguel.
Nasakmit gikan ni Sarte ang usa (1) ka gamay’ng sachet nga gituohang shabu ug usa (1) ka P500-bill nga “marked money”.
Laing nakuha sa possession sa suspek mao ang usa (1) ka itom nga pouch nga may markang “BTS” nga may sulod nga lima (5) ka gamay’ng sachet nga gituohang shabu.
Nakuha usab sa maong buy-bust operation ang usa (1) ka Suzuki Smash kolor itom ug pula nga kombinasyon ug may temporary plate number 0701-1220685, nga gigamit sa suspek.
Nitimbang og 0.80 gramos ang nakuhang giingong shabu nga may gibana-banang kantidad nga P5,440.00.
Sa pasiunang imbestigasyon nga gihimo sa San Miguel Police Station pinaagi ni PCPT PONCIANO MULA ESTROLISO, JR., Chief of Police, niingon ang nadakpan nga gibuwagan siya sa iyang uyab ug nagsugod sa pagpamaligya kaniadtong Disyembre 2022.
Niangkon usab ang suspek nga taga-siyudad sa Tagbilaran ang nag-‘introduce’ niya sa maong ilegal nga kalihukan ug ang source taga-Brgy. Cabawan sa maong dakbayan.
Nibutyag usab ang maong suspek nga mga senior high school nga estudyante ang iyang mga customers ug anaay kontak sa tulunghaan nga maoy iyang hatdan sa ilegal nga tambal.
Niangkon usab si Sarte nga tiggamitan siya sa maong ilegal nga drugas apan “gamay” ra kuno, “pawala sa kapoy”.
Sa wala pa madakpi si Sarte sa maong adlaw, gikan kuno siya naghatud og ilegal nga drugas sa Ubay nga nikantidad og P3,000.
Sa dihang gisuwayan og kuha niining tigbalita sa iyang habig ang nadakpan, wala nihatag sa iyang komento.
Nisaksi sa pag-imbentaryo sa mga nakuhang ebidensya si Brgy. Mahayag Kapitan Rogelio “Roger” Patron, Brgy. Kagawad Allan Gaum ug representante sa media.
Kasamtangang gibalhog sa Police Custodial Facility sa San Miguel PS ang suspetsado samtang giandam ang tukmang kaso batok kaniya.
