Ang media ug ang gobyerno kinahanglan anaay maayong relasyon ug magtambayayong kanunay aron makab-ot ang hiniusang damgo — ang kaayuhan sa katawhan.
Karong panahona nga mas nagkangil-ad ang mga lakang sa mga opisyales sa gobyerno, mas nisamot og kadako ang papel sa media.
Luoy kaayo ang katawhan kon wala ang presensya sa media ilabina kon ang isyu sa korapsyon ug mga iregularidad sa gobyerno ang hisgutan.
Halangdon ang responsibilidad nga ana-a sa mga prinsipyadong sakop sa media ug angay kini suportahan ug panalipdan, dili lang sa katawhan apan lakip na sa gobyerno.
Ang papel sa media maoy sentro sa diskurso ni Presidente Ferdinand Marcos Jr. atubangan sa mga opisyales sa Radio Mindanao Network (RMN) atol sa usa ka courtesy call didto sa Malakanyang.
Matud ni Marcos Jr., gikinahanglan ang hiniusang paningkamot sa tanang mga Pinoy aron makab-ot ang mga plano ug ambisyon sa gobyerno.
Siya nipasabot nga importante kaayo ang papel sa media sa nasudnong kalambuan ilabina ang pagpakatap sa mensahe sa gobyerno nga nagdasig og panaghiusa.
“So the pledge of support and to bring our message to the people is an important one. It is something that those of us who are in government consider to be an integral part of whether or not we are successful or not,” matud sa Presidente.
“And by that, I mean that we need to know that everyone understands what we are trying to do, everyone understands what they can do to help, everyone understands why and the method of what we are trying to achieve. And that is the most important thing for us,” iyang punto.
Kinahanglan kritikal kanunay ang media ilabina sa mga nagbagang isyu sa katilingban nga iyang gialagaran, ug kini angay masabtan sa mga ana-a sa gobyerno, nga “trabaho lang, walang personalan”.
Dili man kalikayan nga anaay mga suhi og baruganan nga mga sakop sa media, mas angay magpundar og lig-ong haligi kitang mga naglantaw sa kaayuhan sa katawhan ug sa kinatibuk-ang nasud Pilipinhon.
Sa mga sinserong sakop sa media nga nagserbisyo sa katawhan sa limpyo nga pamaagi, maghiusa kita nga dili matukimbo ang atong kawsa sa maayong pang-gobyerno diin nangandoy usab nga anaay patas nga hustisya ug pamalaod.
Sa kanunay, ang tumong sa patas nga pang-gobyerno dinuyogan sa timbang nga hustisya ug hait apan sakto ug makatarunganon nga pagpahamtang sa balaod, maoy sinugdanan sa hingpit nga kalambuan ug kauswagan sa katawhan ug sa nasud.
Kining tanan mahimong posible kon magkahiusa ang katawhan ug magpabilin ang positibong tumong ug tinguha sa media, dinuyogan sa suporta sa gobyerno.
