MOKABAT ngadto sa siyam hangtud 10 ka armadong mga lalaki nga gituohang mga sakop sa New People’s Army o NPA ang gika-engkuwentro sa mga sakop sa Philippine Army didto sa bukirang bahin sa Brgy. Baunos, lungsod sa San Isidro kagahapon mga alas 10:40 sa buntag.
Si Army Lt. Gin Lagunero, assistant officer sa Civil Military Operations sa 47th Infantry Batallion sa Philippine Army nga nagbase sa lungsod sa Carmen, nga nahinabi sa BBDN ug sa Bee Sunrise News, nagbutyag nga adunay nihatag og tip sa ilang tropa kabahin sa presensiya sa armadong grupo sa nahisgotang dapit
“Naay nag-tip sa among tropa, naay nakit-ang mga armado nang-extort, nagresponde atong tropa, ” butyag ni Lagunera.
Matud ni Lagunera nga mikabat ngadto sa 10 minutos ang sinukliay sa mga bala tali sa tropa sa militar ug rebelde.
Wa pa matino kun pila ang nasamdan o napatay sa maong grupo kinsa nangatras gumikan kay nalabwan sa gidaghanon sa mga sundalo.
Samtang way naunsa sa panig sa mga sundalo.
Narekober sa nahitaboan ang 13 ka kabhang sa bala sa AK-47 rifle ug 19 ka basiyong bala ss kalibre .45, mga subersibong dokumento, tent o poncho, bugas ug personal nga mga butang.
Dugang ni Lagunera nga ang maong grupo remnant kun salin kini sa Bohol Party Committee ubos ni Dominggo Compoc alias Commander Cobra. (ALAN ANDY NALZARO DALAGAN)
