Sama sa niaging administrasyon ni Presidente Rodrigo Duterte nga daghang mga sakop nga gitangtang lakip na sa iyang Kabinete, mao usab ang nahitabo karon sa pamunoan ni Presidente Bongbong Marcos Jr.
Kining maong istorya dili bag-o sa nawong sa pamolitika ug pang-gobyerno sa nasud Pilipinhon. Gubot gayud.
Si PBBM sama sa usa ka amahan sa usa ka pamilya nga nikastigo sa mga anak.
Apan aron mapanalipdan ang iyang dungog, gipalayas sa iyang hawanan ang mga nagsumpaking mga anak. Gikuhaan sa gahum.
Kinahanglan mo-desisyon ang amahan sa katawhang Pilipinhon kay makaguba kini sa iyang imahe isip lider. Ug iya gayud nga gibuhat.
Ang sunod lakang mao ang pagpangita og mas tarong o tarong gayud kaysa naunang gipangbutang sa puwesto.
Sa pagpili og mga sakop, kinahanglan nga ana-a gayuy kapasidad nga motabang sa iyang administrasyon.
Ana-a man hinuon ang pabor sa luwag ilabina kon kauban sa partido ug ikaduhang nakapabor, kon anaay ikabuga sa posisyon nga isangon.
Apan hunahunaon sa Presidente nga kon mahimo, dili na mapakyas sa pagpili kay kini dili kalikayang makaapekto sa iyang liderato.
Kinahanglan ma-mintinar o mas mapaayo pa ang ‘performance’ sa iyang administrasyon aron kanunay positibo ang ‘ratings’ nga madawat aron padayong mosalig ang mga Pinoy kaniya.
