Usa ka kasabotan o Memorandum of Agreement (MOA) alang sa pagpatunhay sa Fish Buy-Back Program (FBBP) ang gilagdaan tali sa provincial government ug sa pribadong ahensya kagahapon.
Si Gov. Aris Aumentado mipirma sa kasabotan uban ang Office of the Provincial Agriculturist (OPA), Provincial Cooperative Development Office, Provincial General Services Office (PGSO) ug Provincial Treasurer Office (PTO), Bureau of Fisheries and Aquatic Resources- Region 7 (BFAR- 7), Land Bank of The Philippines (LBP) ug hugpong sa mangingisda diha sa People’s Organization ug magpapatigayon (Traders Groups).
Ang nahisgotang programa mao usa ka lakang aron mapakunhod ang presyo sa isda ug ubang produkto sa kadagatan, matud ni acting Provincial Agriculturist Dr. Larry Pamugas.
Si Gob. Aumentado nagpasalamat sa mga ahensya ug mga buhatang nahilambigit niini sa tinguha nga mahatagan usab ang mga mangingisda sa ilang hustong kita’ sa panagat.
Si Renato Auxtero, Presidente sa Peoples Organization, nagkanayon nga dako kaayu ilang pasalamat ni Gov. Aris Aumentado ug sa tanang nitabang sa Isda Program nga maoy makatabang kanila aron dali ra mabaligya ang ilang mga produkto nga dili na sila mag salig sa mga labasera. Siya miingon nga tungod sa buy-back program nahilikay na sila sa pahuwam nga 5/6 aron makabawi sila sa ilang gasto sa pangisda.
Ang buy-back program nahimuslan na sa mga katawhan nga mipalit sa mga isda nga gibaligya sa Old Airport ug Dao Central Market.
Ang programa usa ka lakang nga ang provincial government, pinaagi sa people’s organization sa mga mangingisda, mopalit ug ang POs mobaligya sa di mominus sa 50% sa ilang kuhang isda agi’g suporta sa “buy-back” program sa provincial government.
Ang provincial government mohatag sa training sa mga POs ug mopahiluna, pinaagi sa Provincial Treasurer’s Office (PTO) sa “cashless transaction,” matud sa MOA.
Ang pangulo ug tresorero sa POs sa mangingisda mao ang responsible sa pag-apod-apod sa bayad sa gikompra nga isda ngadto sa laing-laing POs nga nakig-transaction sa provincial government.
Ang PO’s ipailawom sa usa ka training sa ‘social preparation’ aron sa pagpakusog sa ilang hugpong in cordination sa Municipal Agriculturist Office (MAO) o ‘technician’ sa lungsod.
Ubos sa MOA, ang magpapatigayon o trader mobaligya sa kinompra nilang isda gikan sa mga POs ug kinahanglan nga ubos ang presyo basi sa MOA ilang gipirmahan.
Ang provl govt mao ang magpatuman sa sa fish buy back program (FBBP) pinaagi sa Cooperative Devt Office ug mao ang moandam sa pundo alang niini.
Ang Land Bank, usa sa nilagda’ sa MOA, magmugna sa “credit facility” o pamaag sa pahuwam alang sa mga kooperatiba sa isda nga mokompra gikan sa mga Pos. (PIMO/vrvo/ARL)
