Bag-ong tuig, bag-ong kinabuhi/Duyog sa atong mga pagbati.
Sinati nato kining maong mga pulong ilabina kadtong mga natawo sa Kabisay-an hangtud sa bag-ong milenyo. Ambut og kinsa rang mga bataa ang wa makalitok ning maong mga pulong samtang nanaygon sa panahon sa Pasko.
Mahinungdanon kaayo kining maong mga linya alang kanako una tungod kay gitagik kini sa akong uyoan, anghing Vicente “Inting” Rubi, ang kapikas sa maguwang sa akong inahan nga si Brigida “Bidang” Aseniero Rubi. Gikaluhaan kining maong kamingaw kanila sa kaluoy nga gidangatan ni Tiyo Inting kinsa hangtud sa kamatayon wa intawon makapahimus sa gikita gikan sa maong daygon sa taas nga panahon.
Gikinabuhi ni Tiyo Inting ang mensahe sa iyang awit. Sa matag tuig nga moabut, giatubang niya kini og bag-o nga paglaum. Wa niya tugoti ang inhustisya ug pagpahimus kaniya nga mahimong babag sa malaumong pag-atubang sa bag-ong tuig.
Di ikalimod nga nag-anam kalisud ang kinabuhi karong panahona. Tinuod nga bintaha ang 2023 kon itandi ning tuiga nga nagsugod sa pag-antus sa kabangis ni “Odette” dinhi sa Bohol ug silinganang mga isla, di usab mahimong piyongan ang giatubang nga hagit.
Nagpadayon ang hulga sa mga kagubot di lang sa nagpadayon nga gubat tali sa Russia ug Ukrain. Di pa dugay, gisakmit sa South Korea ang mga drones nga gipalupad sa North Korea. Di pa ta makaingon nga nahuman na ang hagit sa China ngadto sa Taiwan, tungod usab kay nagsigi man og haling ang Estados Unidos.
Dinhi sa nasud, nagsugod ang 2023 nga way kasigurohan sa pipila ka mga ahensya nga wa gihapoy gitudlo nga kalihim. Gani, nagpadayon ang krisis sa pagkaon ilabina ang sibuyas bisan pa nga maoy nagsilbing kalihim mismo si Presidente Ferdinand Marcos Jr.
Bisan pa sa pagtaliwan sa giila nga simbolo sa rebolusyong walhon nga si Jose Ma. Sison dito sa Netherlands, usa ka 10-minutos nga panagsangka tali sa mga armadong tawo nga gidudahang sakop sa New People’s Army sa Baunos, San Isidro nagpahinumdum kanato nga nagpadayon pa ang rebolusyon.
Tungod niini, nag-atubang kita sa usa ka tuig nga nagtangag og daghang mga tanghaga. Kini naghatud kanato nga mangutana sa atong kaugalingon kon magpadaug ba ta sa atong kabalaka, kahasol ug pangluod. Tagsa-tagsa nato dunay tubag niana.
Kung akoy inyong pangutan-on, maoy akong sagopon ang awhag ni Tiyo Inting: bag-ong tuig, bag-ong kinabuhi. Apan mahimo ra nako kini kung ang pagsalig anaa kang Ginoong Jesukristo. Mao nay rason kon nganong gitawag Siya nga Manluluwas.
Malipayong bag-ong tuig kaninyong tanan! Ang Dios magauban kanato sa kanunay.
