USA ka 6 anyos nga batang lalaki naangol human aksidenteng nabanggaan sa usa ka motorsiklo kansang drayber giingong nakatagay sa nasudnong dalan didto sa Barangay U-og, lungsod sa Inabanga mga alas 3:50 sa hapon niadtong nakalabay nga adlaw.
Ang biktima giila nga si Vince Latan, molupyo sa maong dapit.
Sigun sa pakisusi sa Inabanga Municipal Police Station nga ang biktima nagbaktas daplin sa karsada ug gigunitan sa iyang iyaan. Apan kalit kining nilugnot ug milabang sa karsada hinungdan nga aksidenteng napunggitan sa usa ka Honda Wave nga motorsiklo, gimanehoan ni Reynaldo Petalcorin, 36, minyo, angkas ang iyang pasahero nga si Mario Torregoza, 34, minyo, pulos taga Bonotbonot, Buenavista, Bohol.
Dugang pakisusi nga kusog ang dinaganan sa maong motorsiklo paingon sa lungsod sa Tubigon. Ug gituohang lango sa bino ang maong drayber.
Pulos nahiagom og mga angol sa ilang kalawasan ang nasampit nga biktima ug ang drayber niini. Ug pulos gihatud sa Francisco Dagohoy Municipal Hospital. Apan ang maong bata gibalhin sa usa ka tambalanan sa siyudad sa Tagbilaran.
Gikustodiya ang maong drayber sa kapolisan apan gibuhian human nagkasinabot sa tagtungod sa maong biktima. ( ALAN ANDY NALZARO DALAGAN )
