Paglabay sa singkwenta ka tuig human sila nakatapos sa sekondarya, ang mga tinun-an nga naglangkob sa Bohol High School Class 1972 ( BHS Batch ’72 ) nagpahigayon ug Golden Reunion. Duha kini ka adlaw nga kalihokan nga pagahimu-on Nobyembre 12-13, 2022. Atol sa unang adlaw sa kalihokan, ang mga sakop sa BHS Batch ‘72 magtagbo ug magtapok alas otso sa buntag didto sa Dr. Cecilio Putong National High School, ang kanhi Bohol High School, alang sa pagpangrehistro. Ipahigayon ang campus tour human sa pagpangrehistro ug isunod ang Misa Pasalamat sa dili pa himoon ang class assembly, pagpili sa mga bag-ong hugpong sa mga opisyales, pagpakuha ug mga hulagway ug dayon ang paniudto.
Human sa paniudto, ang mga sakop sa BHS Class 72 mopadayon ngadto sa Modala Beach Resort, Doljo, Pangalo, Bohol alang sa dugang mga kalihokan. Ang Gala Night magsugod alas sais sa kagabhi-on. Pagka Dominggo, Nobyembre 13, 2022, nagkalain-laing mga kalihokan ug pasi-aw ang ipahigayon ug ipahaum sibo sa tema “The Celebration Forever Grateful”. Gilantaw nga dul-an usa ka gatus ka mga sakop sa Batch ‘72 ang moapil sa Golden Reunion. Gipaabot usab nga kanhi mga magtutudlo sa BHS Class ’72 ang motambong sa maong kalihokan.
Ang mga sakop sa Batch mahinamon kaayo nga nagpaabot ug nangandam alang niini nga Golden Reunion. Ang mga kauban niini nga Batch nga nagtrabaho ug nahiluna na sa ubang mga nasud ug dapit sa kalibotan miuli gayud pagtuyo alang niini nga panagtapok. Mokabat sa dili mominus duha ka gatus ka mga tinun-an ang migraduwar niadtong Marso, 1972 didto sa Bohol High School, dakbayan sa Tagbilaran. (fcpajo)
