TAGBILARAN CITY, Bohol, October 26, (PIA) –Daku nga kalipay nga gipahibaw ni Mayor Rene Borenaga sa lungsod sa Bien Unido ang pagsubo sa mga bag-o nga sakyanan ug himan nga magamit sa lungsod sa pagpa-abante niini sa serbisyo ngadto sa mga katawhan.
Kini diha nga dungan nga gisaksihan sa mga opisyales ug katawhan sa lungsod ang papbendita sa bag-o nga Ambulansya, duha ka dumptruck, duha ka pick-up type nga sakyanan ug usa pa ka passenger type nga iya sa lungsod.
Importante kaayo ang sakyanan sa atong lungsod, kay kapin pa sa 20 kilometros ang kinahanglang byaheon aron makasulod sa labing duol nga tambalanan ug dagkong sentro sa patigayon, saysay ni Mayor Borenaga didto sa kalihukan.
Gikan sa programa sa Department of Health, nakakuha ang lungsod og usa ka Nissan NV350 Ambulance, karga na ang kompleto nga himan sa luwas ug dinali-an nga pagdala sa usa ka pasyente ngadto sa labing duol nga tambalanan sa Ubay o sa Talibon.
Nagpasalamat usab ang babaye nga mayor, ngadto kang Gobernador Erico Aristotle Aumentado sa iyang pagpahigayon sa facilitation alang sa bag-ong ambulansya sa lungsod.
Alang sa mga buhatonon sa mga departamento sa lungsod nga nagtanyag og engineering services ug road infrastructure, may bag-o na usab nga Sino Truck Boom Truck ug lain nga usa ka unit sa Sino truck nga Dumptruck, nga magamit alang sa pagmintinar sa mga kadalanan sa lungsod.
May duha usab na nag-o nga units sa Foton Pick-Up Type nga sakyanan nga mahimo usab nga kargahanan.
Nakabaton na usab ang lungsod og usa ka unit nga Foton passenger type nga sakyanan nga sarang magamit usab sa lungsod sa iyang paghiklin sa katawhan ilabi na sa mga panahon sa katalagman.
Kauban sa mga opisyales nga mingtambong sa pagbendita gawas ni Mayor Borenaga sila Kagawad Taboy Macua , Rosemarie Arcenal Boniel, Ninay Avenido Atillo , SB Secretary Dudz Jim, mga Department Heads ug mga empleyado.
Si Rev. Fr. Aparicio maoy nanguna sa seremonyas sa pagbendita. (PIABohol/MPIO)
