HANGTUD kagabii, wala pa makit-i sa mga rescuers ang usa ka biyudo kinsa aksidenteng naanod sa sapa dihang nipugos og labang bisan og kusog ang baha gumikan sa Low Pressure Area kun LPA didto sa Sitio Ilaud, Brgy..San Miguel, lungsod sa Dagohoy mga alas 7:00 sa gabii niadtong Merkoles.
Ang biktima giila nga si Catalino Reponte y Guadalquiver, 59 anyos, usa ka panday/mason, lumolupyo sa Brgy. San Miguel, Dagohoy.
Sigun sa imbestigasyon sa kapolisan nga ang biktima luwan sa iyang motorsiklo pauli na unta sa iyang pinuy-anan. Dihang giingong nipugos kini og labang sakay sa iyang motor agi sa spilllway nga kusog ang baha hinungdan nga naanod kini.
Wa dayon mareport ang maong hitabo sa mga awtoridad tungod sa problema sa signal.
Si PSSg Ghee Ilao sa Dagohoy Municipal Police nibutyag nga hangtud kagabii, wa pa nila makaplagi ang nasampit nga biktima.
Matud ni Ilao nga nangabot kagahapon ang mga personahe sa Tarsier 117 gikan sa siyudad sa Tagbilaran aron motabang sa pag- rescue. Gawas sa kapolisan, lakip nga nitabang sa search and rescue operation mao ginsakpan sa Bureau of Fire Protection, Municipal Disaster Risk Reduction and Management Office kun MDRRMO, ug mga katawhan sa maong dapit ( ALAN ANDY NALZARO DALAGAN )
