NANAWAGAN si Senior Board Member Tita Baja ngadto sa mga tourist van driver nga dili abusohan ang pagpangayo og komisyon ngadto sa mga nagpadagan og negosyo sa turismo dinhi sa Bohol.
Si Baja kinsa maoy Chairperson sa Committee on Tourism sa Sangguniang Panlalawigan nibutyag sa Capitols Report niadtong Bernes nga base sa iyang nakuha nga mga impormasyon, moabot matud pa sa tag P500 ang komisyon nga pangayoon sa mga tourist van driver gikan sa mga negosyante.
Matud ni Baja nga tungod sa kadako sa komisyon mao usab ang hinungdan nga nganong mahal ang presyo sa ubang mga tourist establishment ngadto sa ilang mga guest.
Gibutyag ni Baja nga ang maong isyo maoy usa sa mga butang nga gikonsedera sa nagpadayong pag-amendar sa Tourism Code dinhi sa probinsiya sa Bohol.
Ang Tourism Code usa ka komprehensibo nga hugpong sa mga prinsipyo kansang katiyoan mao ang paggiya sa mga hingtungdan sa pagpalambo sa turismo, lokal ug national nga kagamhanan maingon man ang komunidad, industriya sa turismo ug ang provisional niini ingon man ang mga lokal ugl langyaw nga mga bisita. ( AND )
