USA ka bodega sa dakong tindahan naugdaw sa sunog sa wa pa mahibaw-i nga hinungdan didto sa Brgy. Pagina, lungsod sa Jagna mga alas 3:20 sa sayong kabuntagon kagahapon, Nobiyembre 22.
Ang one storey nga bodega sa YK Enterprises gipanag-iyahan ni Mr. Yong Bin Tan, usa ka Chinese.
Sigun ni FO2 Lito Acebes sa Jagna Fire Station nga nahinabi sa BBDN ug Bee Sunrise News nga ílang nadawat ang alarma sa sunog mga alas 3:29 sa sayong kabuntagon.
Ang maong bodega adunay mga stock sa plastic ware, kitchen ware, floor mat ug uban pa.
Ningresponde sa maong lugar ang duha ka fire truck sa Jagna Fire Station, usa ka fire truck sa lungsod sa Duero ug usa gikan sa lungsod sa Garcia Hernandez.
Nibutyag si Acebes nga ílang napakgang nga dili makatabok ang kalayo sa silingang mga balay sa nasampit nga bodega.
Gideklarar nga under control ang maong sunog mga alas 4:40 sa buntag ug na fire out mga 5:35 sa buntag.
Way gikatahong dunay naangol sa maong hitabo.
Samtang ang inisyal nga danyos niini gibanabanaang moabot ngadto sa P7 million.
Dugang sa fire investigator nga padayon pa ilang gihimong imbestigasyon kun unsa gayod ang hinungdan sa maong sunog. (ALAN ANDY NALZARO DALAGAN)
