TAGBILARAN CITY, Bohol, Oct 25 (PIA) –Gipailawom sa usa duha ka adlaw nga workshop ang mga sakop sa media sa Bohol aron mahiusa kini sa pagpaningil sa accountability gikan sa mga hingtungdan nga natahasan sa recovery, reconstruction ug rehabilitation gikan sa katalagaman.
Kini aron ikaduso ang accountability o tulubagon sa mga ahensya, kahugpungan ug politikanhong lider sa mga higayon nga adunay gitahas kanila, ilabi na kon pagpahiuli gikan sa katalagman, butyag ni Rosario Liquicia sa Vera Files, usa sa nagpasiugda.
Gidala dinhi sa Bohol sa pagpanguna sa Vera Files, ang Piloting Post Disaster Accountability Journalism in the Philippines gihimo og una dinhi sa Bohol sa panglantaw nga gikan dinhi, mamugna na usab ang mga pamaagi aron ikapamugos sa mga sakop sa media ang pagpatubag sa ni kinsa man ang hingtungdan nga angayan manubag sa o modawat sa pasidungog sa kong kinsa man ang angayan niini.
Segun pa sa mga nagpasiugda sa kalihukan, ang mga hitabo pagkahuman sa katalagman nga dala ni Odette sa Pilipinas nagtanyag og mahinungdanon nga higayon alang sa accountability journalism nga mahatagan na og lugar, ilabi na kay ang nasud, nahimutang mismo sa agi-anan sa mga katalagman saman sa bagyo, linog, pagbuto sa mga bulkan, pagdahili sa yuta ug lunop.
Segurado nga dili lamang sa Odette ang angayan nga ipatubag kay ang Pilipinas, nahimutang sa lugar nga delikado sa mga natural ug tinuyo sa tawo nga katalagaman, mao nga angayan lamang ipahimutang na ang sistema sa pagpaningil sa tulubagon, matud pa ni Red Batario sa Center for Community Journalism and Development (CCJD).
Dugang samga tigpasiugda, samtang daghang local ug foreign media ang mingtaho kabahin sa mga gidangatan sa katawhan human sa katalagman, wala nay magkugi og hatag og mga taho kon naunsa ra, human sa pipila ka buwan.
Tataw kayo nga may daghang nga sugilanon sa pagpaningil sa tulubagon nagpaabut ra nga ikapadayag, mga sugilagon ngano ug kinsa ang manubag sa pagkapakyas sa pagpabarug og balik sa mga tunghaan, mga kabalayan, pagpahiklin na ngadto sa luwas nga lugar gikan sa ilang nahimutangan nga mga delikadong lugar.
Kasagaran nga saysay sa mga gisaligan nga tigtabang, walay budget alang niini. Mahimo ba nga ingon na lang niini?
Manubag ang angayang manubag, u gang media nga maoy giisip nga tigbantay niini, kinahanglang magamhan aron makatabang sa pagpahibaw sa katawhan kabahin sa mga hisgutanan kalabut niini, pagproseso ug pagdumala sa mga gilauman sa katawhan, paghatag og tingog sa mga dili madunggan permi ug pagpatubag sa mga ahensya kang kinsang mga mandatus, mao unta ang paghulip niining tanan.
Butang nga sugdan sa Bohol pinaagi sa Bohol media, laraw sa Vera Files uban sa International Media Support (IMS) ug sa CCJD nga kining accountability journalism padak-on ug himoong sumbanan nga pamaagi aron paninglon na usab sa mga media ug mga komunidad ang mga may mga tulobagon.
Ang workshop magpadayon hangtud Oktubre 26, didto sa MetroCenter Hotel. (RAHC/PIA_7/Bohol)
