TAGBILARAN CITY, Bohol, Dec 19 (PIA) –Anaa na sa 55.51% ang project completion sa Cebu-Bohol Interconnection Project (CBIP) nga maglatag sa 230 kilovolts transmission line gikan sa Sugbo paingon sa Bohol ug magkompleto sa transmission loop sa Leyte, Cebu ug Bohol.
Kini matud pa ni Engineer Ian Husain, ang CBIP project manager ug maoy naghupot ug nangabaga sa transmission lines ug substation components dinhi sa Bohol sa pagtabok sa nahisgutang proyekyo diha sa PuntaCruz sa Maribojoc.
Ang proyekto nga giingon nga moabut sa P19.76 bilyones ka pesos, naglangkob sa 30 kilometros nga Dumanhug-Argao Overhead Transmission Lines, 30 kilometros nga Argao-Maribojoc Submarine Cable, 26 kilometros nga Maribojoc-Corella Overhead Transmission Lines ug ang Corella SubStation.
Gilantaw nga mahuman sa Nobyembre 2023, ang linya maghatag sa Bohol sa mas lig-on nga tinubdan sa koryente, butang nga gipaningkamotan nga ikalatag na sa labing dali nga panahon, human sa makatagam nga kasinati-an sa Bohol dihang may mga katalagman nga makaigo sa Leyte.
Sa kasamtangan, gipasabut ni Engr Husain nga mag mapadali gyud ang pagkahuman niini nga proyekto kon anaa permi ang mga local nga kagamhanan nga magtabang sa pagpasabut sa katawhan sa proyekto aron mas madali ang road-right-of-way negotiations sa mga yuta nga matamakan sa nagtadlas nga mga linya.
Didto sa Capitol Reports, gitaho hinuon ni Engr Husain sa National Grid Corporation of the Philippines (NGCP) nga hinuon, kanunay sila nga modangop sa mga LGU leaders kon may suliran silang ikahibalag sa ilang negisasyon sa linya.
Kon mapatuman ang proyekto, makabaton na ang Bohol og kalig-on sa supply sa koryente, alang sa mas kasaligan nga pagpakutay sa tinubdan sa gahum dagitab, lukop mga isla sa kabisay-an.
Kahinumduman nga una nga gisaad ni Gob Erico Aristotle Aumentado sa iyang kampanya mao ang pagpahiluna sa mas kasaligan nga tinubdan sa koryente nga barato ug limpyo.
Ang Bohol kasamtangan nga naggamit sa sagol-sagol nga koryente nga kasagaran niini, gikan sa koryente nga namugan sa pagsunog sa uling.
Sa pagmahal sa uling sa international nga palitanan tungod sa gira sa Ukraine ug agmahal sa krudo nga itubil sa mga barko nga magdeliver niini gikan sa gawas, hing-ugpot usab ang presyo sa uling nga nakaapektar sa balayronon sa koryente.
Kon mahuman na ang P189B nga transmission Interconnection sa Bohol ug Cebu, naglaom ang kadaghanan nga mobarato na ang balayranan kay nianang panahona, mahuiman na usab ang kontrata sa Distribution Utilities sa Bohol sa ilang pagpalit sa koryente sa mga generation plants ug power suppliers. (RAHC/PIA-7/Bohol)
