ANG Boholanang negosyante nga si Dalareich Polot kinsa giila nga “Chocolate Princess ,” sa Bohol ang napili nga modawat sa Fortune-Goldman Sachs Global Women Award.
Siya maoy labing unang Filipina nga mahatagan sa maong prestigious award.
Si Polot ang usa sa duha ka makadawat sa maong award nga ang usa mao si Hend Osama sa Egypt.
Sila modawat sa award isip kabahin sa Fortune Most Powerful Women Summit nga ipahigayon sa Ritz Carlton Hotel sa Laguna Niguel, California gikan sa October 10 ngadto sa October 12.
Si Polot makadawat sa award gumikan sa iyang proposed project nga “Livelihood Recovery through Cacao Rehabilitation and Production for Women Farmers.”
Kini gitumong pagtabang sa mga cacao farmers kansang panginabuhian naapektohan sa bagyong Odette nga milampornas sa Bohol sa milabayng tuig.
Si Polot ang nailang tighimo og tableya nga Dalareich ug nag-establisar sa unang chocolate factory sa lalawigan human siya miadto sa Europe alang sa pagtuon sa chocolate processing sa Gent Uiversity sa Belgium.
Ang 34 anyos nga lumad nga taga Tagbilaran City molarga paingon sa US karong semanaha aron personal nga modawat sa award. (AND/WV)
