HINGSAMDAN ang ka construction worker human giingong giunay og dunggab sa iyang kauban nga gialegar nga may nervous breakdown kun kabuhi sud sa ilang bunkhouse didto sa Barangay Cogon, siyudad sa Tagbilaran mga ala 1:15 sa hapon niadtong Lunes.
Ang biktima giila nga si Juanito Cañete, 37 anyos, ulitawo, residente sa Sitio Romina Heights, Brgy. Cabatuan, Danao, Bohol.
Ang suspetsado nailhan nga si Antonio Genon, 35, minyo, taga Negros Oriental, pulos construction worker sa padayong gitrabaho nga Cogon Public Market.
Nasayran sa imbestigasyon sa kapolisan nga samtang ang biktima nidalit og pagkaon sa maong suspek sud sa ilang bunkhouse tungod kay iyang nabantayan nga sud na sa pipila ka mga adlaw nga way kaon. Apan igo lang paglipot sa biktima sa way daghang pangutana ug way igong rason , kalit lamang gidunggab sa suspek gamit ang mahait nga hinagiban.
Nahiagom ang biktima og mga samad dinunggaban sa nagkadaiyang parte sa iyang kalawasan hinungdan nga nalandig kini sa Gov. Celestino Gallares Memorial Hospital sa siyudad sa Tagbilaran. Ug padayon pang giatiman sa mga doktor.
Samtang ang suspek nagtingkagol na sa bilanggoan sa Tagbilaran.
Dugang pakisusi gikan sa iyang mga kauban sa trabaho nga ang suspek nakasinati og nervous breakdown o gikabuhi kini. ( ALAN ANDY NALZARO DALAGAN )
