Kon ikaw naglingkod sa opisina de gobyerno, kon empleyado ka sa katawhan, kinahanglan imong makuha ang ilang pagsalig.
Ang hanay sa Philippine National Police (PNP) maoy usa sa giilang hugaw nga ahensya sa gobyerno tungod sa isyu sa ilegal nga drugas diin daghan sa mga sakop niini ilabina kadtong mga ‘high-ranking officials’ nga nalambigit.
Gani, ang hepe sa buhatan sa PDEA sa Taguig City kaniadtong Oktubre 2022 nakuhaan og 900 kilos nga giingong shabu nga gibana-banang moabot og P6.7 o P7 bilyones sa usa ka storage facility nga gipanag-iya niini.
Ang maong panghitabo maoy nakapaaghat ni DILG Secretary Benhur Abalos Jr. nga manawagan nga mo-sumiter og ‘courtesy resignation’ ang tanang kernel ug heneral sa kapulisan. Boluntaryo nga pag-ambak sa puwesto ang iyang gihangyo.
Kaniadtong Lunes, matud ni Abalos, ana-a na sa 60 porsyento sa mga taas og ranggo nga mga opisyales sa PNP ang nisanong sa maong panawagan. Sa numero matud pa sa kalihim, sobra sa 500 na nga mga kernel ug heneral ang nisumiter sa ilang courtesy resignation ug gilauman nga modaghan pa ilabina karong Enero 31, 2022 ang deadline.
Nibutyag usab si Abalos nga iya ng gidiskurso ngadto ni PNP chief Rodolfo Azurin Jr. ang maong panawagan ug napasa na ug gi-aprobahan ni Presidente Ferdinand “Bongbong” Marcos Jr.
Si Senate Minority Leader Aquilino “Koko” Pimentel III wala niuyon sa lakang ni Abalos.
Ang gusto ni Sen. Koko nga “kasuhan” ni Abalos ang mga opisyales sa PNP kon anaay ebidensya.
Mao usab kini ang sentimento sa katawhan. Maayo man ang tumong ug tinguha sa maong kalihim sa DILG apan dili praktikal. Sayang ang oras.
Usa usab ka beteranong mediaman pareho og punto sa maong magbabalaod. Ang pagsabot sa kadaghanan, wala kahibawo sa angayang buhaton si Abalos aron mahatagan og konkretong solusyon ang maong naghitak nga problema.
Mas maayo siguro kon siya ang unang mo-sumiter og ‘courtesy resignation’.
