PADAYON pang giatiman sa tambalanan ang usa ka ulitawo human dunggaba sa P6, Brgy. Hambabauran lungsod sa Ubay mga alas-12:23 ang takna sa sayong kaadlawon niadtong Domingo.
Giila ang biktima nga usa ka Efren Saludaga, Jr. y Tenchavez, 23, ulitawo, Criminology graduate ug nagpuyo sa P3 sa samang barangay.
Nakaangkon kini og dose (12) ka mga samad-dinunggaban sa nagkadaiyang parte sa lawas, daling gidala ngadto sa Don Emilio del Valle Memorial Hospital sa Ubay.
Nailhan ang suspetsado pinaagi sa mga nakasaksi ug sa motorsiklo nga nahabilin human sa panghitabo, nga usa ka Jonil Cuyacot y Lingo, 27, mag-uuma ug residente sa P1, Brgy. Pag-asa, Ubay.
Sumala sa Police Report nga hinikay ni PSSg Randy Tuyor, ang suspek naglakaw lang sa pagsibat.
Sa pagka-1:32 sa hapon sa samang adlaw, ang gikatahapan mitahan sa iyang kaugalingon sa buhatan sa kapolisan inubanan ni Brgy. Kag. Renante Golosino sa Brgy. Pag-asa.
Ang pasiunang imbestigasyon nagbutyag nga ang biktima nagtagay uban sa iyang mga paryente sa maong dapit sa dihang miabot ang suspetsado ug kauban nga parehong ubos sa gahom sa makahubog nga ilimnon.
Matud pa, may mainitong argumento tali sa biktima ug kauban sa suspek nga giilang usa ka Kevin Alvero y Ludivese, 26, mag-uuma ug taga-P2,Brgy. Tubog, Ubay.
Gisukmatan sa nauna ang naulahi nganong nagsuot sa Fraternity shirt nga nakainom.
Nunot niini, gisumbag sa suspek ang biktima kinsa naigo sa nawong dayon mibunlot sa dala niining kutsilyo ug gidunggab ang biktima.
Kasong Frustrated Homicide ang gi-andam nga isang-at sa piskalya. ###REYLAO/Wenny Reyes
