TAGBILARAN CITY, Bohol, January 13 (PIA)–Ang Department of Budget and Management (DBM) niadtong Miyerkules mipahibalo nga ang ikaupat ug kataposang tranche sa gimando nga pagsaka sa sweldo sa mga empleyado sa gobyerno miepekto niadtong Enero 1 ning tuiga.
Sa usa ka pahayag, ang DBM nagkanayon nga ang ikaupat nga tranche sa usbaw sa suholan mao ang kataposang hugna sa usbaw sa sweldo nga gimando sa Republic Act (RA) 11466 o ang Salary Standardization Law of 2019 (SSL V).
Ang unang tranche sa SSL V mi-epekto niadtong Enero 1, 2020.
Ang RA 11466 naglangkob sa tanang posisyon alang sa sibilyan nga mga personahe, regular man, kaswal, o kontraktwal, appointive o elective, full-time o part-time, nga anaa na karon o human niadto gihimo sa executive, legislative, ug judicial nga mga sanga; mga komisyon sa konstitusyon ug uban pang mga opisina sa konstitusyon; state universities and colleges (SUCs); ingon man mga government-owned or controlled corporations (GOCCs) nga wala nasakop sa RA 10149 o sa GOCC Governance Act of 2011.
Ang SSL V magamit sa tanang posisyon para sa mga sinuholan nga LGU personnel, regular man, contractual, casual, elective, o appointive; sa usa ka full-time o part-time nga basehan, karon anaa na o pagkahuman gibuhat sa mga LGUs, ug ang tanang posisyon sa barangay personnel nga gibayran matag bulan og honoraria.
Sa laing bahin, si DBM Kalihim Amenah Pangandaman miingon nga ang DBM mohimo ug pagtuon sa government compensation structure sa lain-laing national government agencies ug government-owned and controlled corporations (GOCCs) sa direktiba ni Presidente Ferdinand R. Marcos Jr.
Ang Presidente nimando sa DBM sa paghimo og usa ka pagtuon aron maseguro nga ang bayad sa tanang sibilyan nga mga personahe kasagarang makigkompetensya niadtong anaa sa pribadong sektor nga nagbuhat og susamang trabaho aron sa pagdani, pagpabilin ug pagdasig sa mga pundok sa mga takos ug dedikado nga mga alagad sibil.
Matud pa ni Pangandaman nga ang DBM usab nagrepaso sa mga bayronon sa kasamtangan nga mga benepisyo nga gihatag ngadto sa mga kwalipikadong kawani sa gobyerno aron masusi kon kini nagkinahanglan og kausaban sa umaabot.
Ubos sa 2023 General Appropriations Act (GAA), mokabat sa P48 milyones ang gigahin ubos sa Governance Commission for GOCCs’ (GCG) budget aron suportahan ang pagpahigayon sa pagtuon sa government compensation structure sa lain-laing ahensya sa gobyerno ug GOCCs. (ecb/PIA7-Bohol)
