Kaniadtong Huwebes, niingon si Presidente Ferdinand R. Marcos Jr. nga ang 1951 Mutual Defense Treaty (MDT) tali sa Pilipinas ug Estados Unidos kay “continuously under negotiation and under evolution,” matud sa taho sa Office of the Press Secretary sa Facebook post niini.
Ang Presidente nihimo sa maong tubag sa interbyu sa mga sakop sa media atol sa iyang pagtambong sa Kadiwa ng Pasko project didto sa Quezon City.
“Well, the Mutual Defense Treaty is continuously under negotiation and under evolution. I always call it as an evolution because things are changing,” suma sa Presidente.
Matud pa sa maong hepe ehekutibo, dihay “many requests and proposals” gikan sa mga Amerkano, ilabina ilawom sa Enhanced Defense Cooperation Agreement (EDCA).
“So all of that is under study now to see what is really feasible and what will be the most useful for the defense of Philippine territory,” punto pa ni PBBM.
Matud sa anak nga Marcos, nga ang hisgutanan sa seguridad ug depensa lakip sa ilang gidiskurso atol sa meeting kauban ni US Vice President Kamala Harris sa niaging semana.
“Yes, we covered that and many more subjects. But essentially, on the security, ‘yun tinitingnan natin ‘yung kanilang pino-propose, ‘yung mga joint exercises, and EDCA, the use of our bases, all of these. We are in the middle of that,” matud pa ni Marcos Jr.
Sa pagbisita dinhi sa nasud ni VP Harris, niingon kini nga ang mga pagpangatake batok sa nasudnong kusog didto sa South China Sea, maoy magbuhi sa mga saad sa US mutual defense.
Si National Security Adviser Secretary Clarita Carlos una ng niingon nga ang gobyerno sa Pilipinas nihimo na og usa ka grupo nga maoy mag-estudyo ug mosusi sa 1951 Mutual Defense Treaty.
Ang maong grupo, matud ni Carlos, naglangkub sa mga opisyales gikan sa National Security Council (NSC), sa Department of National Defense (DND) ug sa Department of Foreign Affairs (DFA).
Sa panahon ni Presidente Rodrigo Duterte, plano niini nga wagtangon ang MDT ug EDCA ug uban pa’ng mga kasabutan tali sa mga Amerkano kay wala kini kaangay sa ilang gibuhat sa Pilipinas nga gihimong “itoy” o mosunod ra kon unsay ilang gusto.
Nangatarungan usab si Digong nga ang pagbutang og mga base-militar sa Estados Unidos dinhi sa Pilipinas magduslit lang sa kapungot sa China batok sa Pilipinas, ilabina anaay bikil ang Amerika ug ang China.
Nidugang usab si Duterte nga ang giapas ra sa Amerika mao ang ilang “interes” sa Pilipinas.
Apan alang sa uban, mas maayo nga ana-a ang MDT ug ang EDCA kay ana-a kita’y masandigan kon magkinaunsa — ang Amerika nga maoy giilang higala gayud sa Pilipinas.
