USA ka doktora mireklamo sa kapolisan sa siyudad sa Tagbilaran human ang iyang mga mahalong alahas nga bulawan giunay og kawat sa iyang security escort samtang dunay gipalit sa usa ka supermarket sa Brgy. Cogon niadtong Huwebes sa hapon.
Ang biktima giila nga si Princess Aiza Marcos, 33 anyos, dalaga, residente sa Brgy. Totolan, Dauis.
Ang suspetsado nailhan nga si John Dennis Omusora, hamtong ang pangedaron, taga T. Padilla Street, Cebu City.
Sigun sa asoy sa biktima sa kapolisan sa siyudad sa Tagbilaran nga mga alas 2:00 sa hapon iyang gibilin ang iyang bag ngadto sa suspek kay mosulod siya sa Plaza Marcela Mall sa Brgy. Cogon, Tagbilaran aron mopalit og usa ka sakong bugas.
Sa iyang pagbalik, wala na diha sa maong lugar ang suspek. Ug tungod sa iyang kabalaka nangayo dayon siya og pakitabang sa security sa maong tindahan ug iya dayong gisusi ang CCTV footage sa maong lugar. Didto ilang nakita nga ang bag sa maong biktima gibilin kini sa baggage counter dayon nilakaw ang maong suspek.
Pagsusi sa biktima sa iyang bag nawagtang na ang iyang 22 karat nga gold bracelet nga mokantidad ngadto sa P200,000 ug 18 karat nga gold ring nga mokabat kapin kun kulang ngadto sa P15,000.
Gitugyan na ang maong kaso sa Theft and Robbery section sa City PNP. ( ALAN ANDY NALZARO DALAGAN )
