Human sa damyos nga gibilin sa nilabayng bagyong Odette, libo-an sa mga Bol-anon ang nawad-an sa ilang mga pinuy-anan, diin kini ang usa sa mga yango-ngo nga ilang gipadangat sa kagamhanang probinsiyal human sa usa ka tuig human nilabay ang super typhoon Odette.
Atol sa ” The Capitols Report” nga gipahigayon sa Desyembre 16, 2022, gibutyag ni Gobernador Aris Aumentado nga aduna pay paglaom nga makadawat ang mga bol-anong biktima sa bagyong Odette, diin mahinumduman nga nahurot ang pondo sa buhatan sa DSWD, hinungdan nga daghan pa sa mga Bol-anon nga hangtod karon naghandom ug tabang gikan sa gobyerno.
Tungod niini, ang National Housing Authority (NHA) migahin ug kapin P797 ka milyon, usa Emergency Housing Assistance Program (EHAP) alang sa mga pamilya nga naglisod ang kahimtang tungod sa nasangpit nga bagyo.
Ang P797,535,000 nga alokasyon sa mga bol-anon, gibahin-bahin kini, diin adunay pamilya nga makadawat ug tag P10,000 ka pesos ug mokabat sa 74,947 ka pamilya ang makadawat niini, samtang ang 9,613 ka mga pamilya nga giingong wala kaayo maapektuhi sa nilabayng bagyong Odette makadawat ug tag 5mil ka pesos.
Sa kinatibuk-an moabot sa 84,650 ka pamilyang bol-anon ang maka benepisyo sa maong “EHAP 2nd TRANCHE” ug target kining ma-implementar sa sugod niadtong buwan sa Nobyembre hangtod sa buwan sa Pebrero 2023.
Samtang sa laing bahin mihatag usab ug hinabang si Kanhi Presidente Rodrigo Duterte nga nagakantidad ug 100 milyon ug kini gibahin-bahin kini sa tag Php25 milyones sa lungsod sa Carlos P. Garcia (CPG), Ubay, Loboc, ug Talibon nga maoy nakaangkon ug grabing damyos.
Busa niining anibersaryo gikan sa pag-igo sa bagyong Odette padayon gihapon ang mga lakang sa gobyerno labi na sa mga hinabang aron sa ingon padayon nang makabangon ang katawhang Bol-anon.
Dugang sa kalambuan pag-abot sa enerhiya mao ang 27 megawatts solar power sa lungsod sa Dagohoy nga masugdan sa tuig 2023-2024 aron madugangan ang power supply sa Bohol.
Sa pagkakaron, kining maong lakang sa National Housing Authority pinaagi sa kagamhanang probinsiyal sa Bohol sa pagpanguna ni Gobernador Aris Aumentado, usa sa naghatag ug paglaom labi na sa mga Bol-anon nga nahimong lisod ang estado sa kinabuhi tungod sa nilabayng bagyong Odette. (PiMO/rvo/Adrian Tagupa)
