PATAY nga nahidangat sa tambalanan ang usa ka empleyado sa Local Government Unit kun LGU-Baclayon human gidunggab sa makatulong higayon didto sa Purok-5, Barangay Montaña, lungsod sa Baclayon mga alas 11:40 sa buntag niadtong Sabado.
Ang biktima giila nga si Gaudioso Pamis Ligones, 56 anyos, minyo, empleyado sa munisipyo nga nadestino sa merkado publiko, molupyo sa Purok-4, Brgy. San Roque, Baclayon, Bohol.
Ang suspetsado nailhan nga si Virgilio Talictic, 67, minyo, Taga Purok-4, Brgy. Montaña, Baclayon.
Sigun sa imbestigasyon sa kapolisan nagbutyag nga samtang ang duha nagtagay sa second floor sa Purok Center sa maong dapit. Sa dihang nakatulog ang biktima, giingong niuli ang suspek ug nikuha og sundang nga kris sa ilang balay dayong gibalikan ug gidunggab ang biktima sa makatulong higayon tumong sa dughan niini.
“Gainom anang buntag ang duha ug naghisgot-hisgot sa ilang daang bikil,” butyag ni PCPL Protacio Man-on Jr. sa Baclayon Municipal Police Station.
Matud ni Man-on nga giingong gibundakan og bato sa biktima ang suspek sa dugay nang katuigan.
Nahiagom og tulo ka samad dinunggaban ang biktima sa iyang dughan.
Gidala pa sa Gov Celestino Gallares Memorial Hospital sa siyudad sa Tagbilaran apan gideklarang dead on arrival.
Gitumbok nga personal grudge ang hinungdan sa maong hitabo.
Nadakpan ang suspek sa niresponding kapolisan. ( ALAN ANDY NALZARO DALAGAN )
