MIPAKANAUG si Gobernador Aris C. Aumentado og Executive Order aron pagtabang sa mga kabus nga mga Bol-anon nga naglisod ang kahimtang ug way sarang ikagasto kun may mawad-an og minahal sa kinabuhi.
Gipakanaug ni Aumentado ang Executive Order No. 10-A o mas nailhan nga Bereavement Assistance Program. Kini alang sa katawhan Bol-anon tungod kay gusto sa gobernador nga hatagan og kasayon ang mga pamilyang lisod ang estado sa kinabuhi.
Ilawom sa Section 465 sa Republic Act number 7610 o mas nailhang Local Government Code, gipalig-on ang maong executive order.
Mahimong makabenepisyo sng mga hingtungdan kung tinood nga taga Bohol ang mitaliwan bisan paman tuod kung sa laing probinsya kini namatay basta ang maong haya himoon sa lalawigan.
Usa sa benepisyo nga madawat mao ang P3,000 nga cash assistance basta ikapakita lang sa hingtungdan ang death certificate ug address sa mitaliwan.
Kinahanglan usab nga naa ang hingtungdan sa namatay aron siguradong madawat ang giingong hinabang. Apan kong walay pamilya nga moangkon niini sulod sa 40 ka adlaw dili makadawat sa maong assistance.
Gikatahong moduol lang sa buhatan sa Office of the Provincial Social Welfare and Development o OPSWD aron sa pag-avail sa maong programa tungod kay epektibo na ang maong sugong ehekutibo sa niadtong Septiyembre 29, 2022. ( AND )
