TAGBILARAN CITY, Bohol, September 27 (PIA)–Gitudlo ni Presidente Ferdinand “Bongbong” Marcos Jr. si retired chief justice Lucas Bersamin isip bag-ong Executive Secretary, gipahibalo sa Malacañang adlaw’ng Martes, Setyembre 27.
Gidumala ni Marcos ang panumpa sa katungdanan ni Bersamin sa wala pa ang pagpahigayon sa 9th Cabinet meeting sa Malacañan Palace sa Manila, matud pa sa usa ka press statement ni Press Secretary Trixie Cruz-Angeles.
“Former Chief Justice Lucas Bersamin has taken his oath of office as Executive Secretary, before President Ferdinand Romualdez Marcos Jr. He began his duties immediately by attending the 9th Cabinet meeting right after swearing in (Si kanhi Chief Justice Lucas Bersamin nanumpa sa katungdanan isip Executive Secretary, atubangan ni Presidente Ferdinand Romualdez Marcos Jr. Gisugdan dayon niya ang iyang mga katungdanan pinaagi sa pagtambong sa 9th Cabinet meeting pagkahuman sa pagpanumpa),” matud pa ni Cruz-Angeles.
Gihulipan ni Bersamin ang ni-resign nga Executive Secretary nga si Victor Rodriguez nga kasamtangang nagsilbi isip Presidential Chief of Staff.
Isip Executive Secretary, si Bersamin tawgon nga “Little President” kinsa gimandoan nga direkta nga motabang sa Presidente sa pagdumala sa mga kalihokan sa gobyerno ingon man sa pagdumala sa mga operasyon sa Executive Office, sumala pa sa Opisyal. Gazette.
Sa wala pa ang iyang bag-ong katungdanan, si Bersamin nagsilbi isip chairperson sa Government Service Insurance System (GSIS) ubos sa liderato sa gisundan ni Marcos nga si kanhi presidente Rodrigo Roa Duterte.
Si Bersamin ginganlan isip pinakataas nga mahistrado sa nasod niadtong Nobyembre 2018 ug niretiro sa hudikatura niadtong Oktubre 2019.
Lumad nga taga Abra, si Bersamin nakahuman sa iyang abogasiya sa University of the East niadtong 1973 ug nahimutang sa ikasiyam sa bar examinations sa samang tuig.
Nagserbisyo siya isip presiding judge sa Quezon City Regional Trial Court Branch 96 niadtong 1986. Niadtong 2003, si Bersamin gitudlo nga kaubang hustisya sa Court of Appeals ug gi-promote sa Korte Suprema niadtong 2009.
Nakuha niya ang Judicial Excellence Award alang sa Best Decision sa Civil Law ug Criminal Law. (ecb/PIA7-Bohol)
![](https://i0.wp.com/boholbalita.com/wp-content/uploads/2022/08/297250573_5616130511770268_6935859902824866874_n-scaled.jpg?fit=1024%2C450&ssl=1)