GISENTENSIYAHAN si kanhi Panglao Mayor Nila Montero nga prisohon og 24 ka tuig human nakumbikto sa Sandiganbayan gumikan sa kalapasan sa Graft and Corrupt Practices Act ug 4 counts sa Unlawful Appointment.
Kini may kalambigitan sa pagtudlo ni Montero og upat ka mga executive assistance sa lungsod bisan sud pa sa election ban niadtong tuig 2013.
Base sa 49 ka mga pahina nga hukom sa Sandiganbayan penetsahan og Oktubre 26 karong tuiga, si Montero sad-an sa giatubang nga kaso nga gipasaka sa Ombudsman niadtong Abril 12 tuig 2018.
Sa maong hukom, gipahamtangan si Montero og pagkapreso sa unom ka tuig ug usa ka bulan isip minimum ug hangtud sa napulo ka tuig isip maximum sa matag ihap sa upat ka graft convictions.
Lakip usab niíni ang pagbayad og 1.3 milyones ka pesos nga nag-representar sa gisuweldo sa upat ka mga executive assistance.
Gimando usab sa maong hukom ang perpetual disqualification kang Montero gikan sa paghupot og bisan unsang katungdanan sa atong goberno.
Sa iyang paglingkod sa pagkamayor niadtong Hulyo 1, 2013, gi-hire ni Montero si Noel Hormachuelos isip municipal administrator/consultant for administrative services, Danilo Reyes isip public information officer, Apolinar Fudulan isip Public Employment Service Office coordinator/IT consultant, ug Fernando Penales isip consultant on infrastructure and engineering services.
Si Hormachuelis nidagan isip running mate ni Montero. Samtang ang tulo pulos nidagan sa pagkakonsehal sa samang tuig apan ang upat pulos nangapildi.
Ang mga consultant gipang-hire sa job order basis para mosilbi sa mayor nga way gihimo nga contract of service o giisyo nga appointment paper nga gisusi ug giaprubahan sa Sangguniang Bayan.
Gilatid sa Section 94 sa Local Government Code, nga way kandidato kinsa napildi sa bisan unsa nga eleksiyon nga matudlo sa bisan unsa nga buhatan sa gobiyerno sud sa usa ka tuig human sa bag-ong nahuman nga piniliay. ( AND )
