Pormal na’ng gidawat ni Chito Fuentes ang posisyon isip Editor sa BBDN Online human nalatid ang detalye sa iyang pagdumala ug kaakohan sa panagsabot kauban ni BBDN Publisher Johnny Orioque kaniadtong Domingo sa syudad sa Tagbilaran.
Si Fuentes kinsa beterano sa print ug broadcast media madasigong nidawat sa kaakohan ug hagit nga moapil sa social media nga karon gisuong sa Bohol Balita Newspaper.
Bisan kon nipahuway na siya sa paspas nga nagpadangat sa iyang mga sinuwat sa mga pamantalaan local ug nasyonal, apan naagni siyang mobalik sa bag-ong nataran sa pagmantala sa social media.
“Siya na ang BBDN Online Editor,” matod pa ni Johnny Orioque sa pamahayag. “We are proud and honored to have Bai Chito Fuentes as part of BBDN.”
Gipasabot ni Orioque nga ang papel ni Fuentes mao ang hul-os nga pagdumala sa BBDN Online, Bohol Balita Website, Facebook Account ug ubang social media platform nga nagdala sa ngalan sa Bohol Balita Newspaper.
“Ang tanang mga artikulo nga mogawas sa BBDN online: news articles, breaking news, advertisements ug uban pa, mag-agi sa pagtutok ni bai Chito, sugod karong adlawa,” matod pa ni Orioque.
“Siya ang maghukom sa tanang mogawas sa online ug pagdebuho sa porma, istraktura ug unod niini.”
Giklaro ni Orioque nga taas ang iyang pagsaludo ug pagpasalamat nga sa katapusan, gidawat ra ni Fuentes ang iyang pagsampit aron matabangan ang Bohol Balita nga makahatag sa tukmang kasayuran alang sa mga magbabasa ug magsunod sa social media.
Dugang pa sa Publisher nga posible pang mosuwat og balik si Fuentes isip Kulomnista sa Bohol Balita Newspaper print gawas sa iyang pagdumala sa BBDN online.
Si Fuentes kinsa giila nga usa sa mga haligi sa Bohol media, giputos na sa daghang kasinatian. Siya ang unang Editor-in-Chief sa The Word sa Divine Word College nga karon HNU, isip student publication gikan sa estado nga School Publication.
Nahimong Editor sa daghang pamantalaan sa Bohol sama sa Kinampay, Sunday Post, Ang Balita Sano ug uban pa. Magsusuwat ug correspondent sa Ang Pahayagang Malaya, Philippine Daily Inquirer, The Freeman, Cebu Daily News ug ubang nasudnong pamantalaan.
Ang labing awahi niyang pagbansay isip magsusuwat mao ang pagkuyog sa administrasyon ni kanhi President Rodrigo Duterte isip writer ug propagandista sa panahon sa kampanya sa eleksyon sa 2016. Usa siya sa tulo ka magsusulat ug litratista nga nagpatik sa libro “Duterte: The Journey to Malacanang” niadtong 2017.
Ang Bohol Balita Online nagsugod kaniadtong Agosto 1, karong tuiga dihang gilusad og balik ang Bohol Balita Daily News Facebook account. Gisundan kini sa pormal nga paglusad sa Bohol Balita website sa Septiyembre 18, 2022.
Sud lamang sa tulo ka buwan, nakaabot na ang Bohol Balita Facebook account og mokapin sa tunga sa milyon ka lain-laing mga tawo sa tibouk kalibotan. (JPEO)
