Ang gaba o resulta sa dautang binuhatan sa usa ka tawo, moabot ra gayud, dili man karon o ugma, apan sa hustong panahon.
Ang aktor, komedyante ug kanhi Quezon City councilor nga si Roderick Paulate gisentensyhan sa Sandiganbayan nga mapriso og hangtud 62 ka tuig tungod sa “graft and falsification of public documents” nga may kalabutan sa pag-hire niini og mga “ghost employees” kaniadtong 2010 sa dihang konsehal pa kini sa Quezon City.
Sa usa ka 130 ka pahina nga desisyon nga gipahibawo kaniadtong Nobiyembre 25 apan gipagawas lang sa publiko kaniadtong Biyernes, Disyembre 02, ang korte sa Seventh Division nakakita nga ‘sad-an’ si Paulate sa 1 ka ihap nga kalapasan sa Section 3 (e) sa Akta Republika 3019 o ang Anti-Graft and Corrupt Practices Act ug 9 ka ihap sa “falsification of public documents” ilawom sa Article 171 of the Revised Penal Code, matud sa taho sa The Philippine Star kaniadtong Biyernes ug Sabado.
Ang Buhatan sa Ombudsman nipasaka sa maong mga kaso kaniadtong Abril 2018, diin ang maong mga kaso nag-ugat sa pag-hire sa opisina ni Paulate og 30 ka mga “ghost” or fictitious job contractors gikan Hulyo hangtud Nobiyembre 2010.
Ang ombudsman niingon nga si Paulate “falsified a job order/contract of service” lakip na ang mga pirma sa mga “fictitious contractors” aron ang city government ma-obligar sa paggahin og pundo alang sa ilang mga suweldo.
Ang maong hukom gilagdaan ni Associate Justice Zaldy Trespeses kauban nila ni Associate Justices Ma. Theresa Dolores Gomez-Estoesta ug Georgina Hidalgo.
Dinhi sa Bohol, ang usa sa mga sakop sa OGAR nga si Willy Ramasola, kinsa anaay personal nga krusada batok korapsyon, nakapangutana basin ana-a usab mga “ghost employees” ang lungsod sa Balilihan base sa usa sa iyang mga Facebook posts.
Alang sa uban, dili ikapadaplin ang posibilidad nga ana-a gayuy mga “ghost employees” sa mga kalungsuran dinhi sa lalawigan.
Kay ang mga kurakot ug abusadong lider sa gobyerno, mangita gayud og paagi aron makakawat sa salapi sa katawhan.
Ang gahum temporaryo ra niining kalibutana. Molabay ra kana. Inig kahupas sa gahum, anha na maningil ang gaba.
