Walay pagkapu-o ang ilegal nga drugas dinhi sa Pilipinas, lakip na dinhi sa lalawigang Bol-anon.
Daghan ang nagtuo nga si karon kanhi Presidente Rodrigo Duterte maoy makapapas sa hingpit sa maong bug-at nga suliran sa nasud ug dinhi sa Bohol sa dugay ng panahon. Ang bag-ong administrasyong Marcos Jr. wala kakuha og dakong pagsalig gikan sa katawhan sa maong problema.
Sa nigawas nga taho sa media, ang Kagamhanang Probinsyal sa Bohol ilawom sa administrasyong Aris Aumentado anaay maayong plano aron mas magmalampuson gayud ang maong kampanya batok sa ilegal nga kalihukan.
Mohatag og ganti (reward) sa kon kinsa ang makahatag og klarong impormasyon mahitungod sa mga naghimo o nagpaluyo sa guinadiling tambal.
Kini ang gipaabot ni Gob. Aris atol sa iyang programa nga Takna sa Gobernador, diin nanaad nga sa iyang administrasyon dili niya undangan hangtud mapu-o gayud.
Apan matud pa, wala pa’y hipno kon pila gayud ang ganti sa makahatag sa gikinahanglan nga kasayuran nga magresulta sa pagsikop sa mga malapason.
Matud sa gobernador, nga ang paghatag sa ganti pagahisgotan pa sa tigum sa mga opisyal, lakip ang law enforcement.
Si police provincial director Col. Lorenzo Batuan nagbutyag nga ubos sa iyang pagdumala iyang paningkamutan nga mapakgang ang illegal drugs, ingon man ang illegal gambling ug ubang krimen.
Maayo kining maong ideya sa gobernador. Ug kinahanglan nga itago o dili i-publiko ang mga ngalan sa maghatag og impormasyon sa maong kalihukan alang sa ilang kaugalingong seguridad.
Mas magmalampuson usab kini og ayo kon ang mga LGUs mohatag sa ilang 100% nga suporta ilabina kini magsukad sa kabarangayan.
