CORTES, Bohol, Oct 3 (PIA)—Sa milabay nga napulo ka buwan, mingsaka na og 62% ang presyo sa matag kilowatt nga konsumo sa mga balay, kasagaran niini apektado sa generation charges nga ming-ugpot gikan sa P 6.26 niadtong Nobyembre sa miaging tuig, ngadto na sa P11.55 niing buwan sa Septembre.
Ang epekto nini, gikan sa 10.66 ang matag kilowatt nga konsumo sa Nobyembre, mingsaka na ngadto sa P 17.20 sa milabay nga buwan.
Sa buwan sa Pebrero maoy labing mahal ang generation kay bugto pa ang linya sa National Grid Corporation of the Philippines ug ang pipila ka lugar nga may koryente saBohol, nagsalig lamang sa diesl power plant, power barge ug pipila ka megawatts nga gipagawas sa mga hydro power plants sa Bohol.
Dili pa usab maseguro kon wala na bay pagsaka sa presyo sa buwan sa Oktubre.
Samtang nagpadayong nalansang ang distribution, supply ug metering charges sa Bohol Electric Cooperative I alang sa mga konsumidor sa BOHECO I nga anaa lamang sa P 1.6109 ug Reinvestment Fund for Sustainable Capital Expenditures nga anaa sa P0.7676 gikan sa buwan sa Abril, ang generation gayud ang nagpadaku sa balayranan.
Ang generation, maoy ibayad sa konsumidor sa mga power suppliers nga ang labing dagkong supply niini, gikan sa Cebu Energy Development Corporation (CEDC) nga nagsupply sa halos katunga sa panginahanglan sa Bohol ug sa GN Power nga nagsupply usab sa halos 40% sa gikinahanglang koryente sa Bohol.
Kinig duha ka mga power suppliers, mibaligya sa koryente nga gilang gipaagi na usab sa transmission lines nga gipabarug sa National Grid Corporation of the Philippines.
Ang CEDC nga kanhi nailhan sa ngalan nga Global Business Power Corporation gipanag-iya sa Meralco Power Generation Corporation ug mibaligya sa hydroelectric ug geothermal power.
Sa laing bahin, ang ikaduhang labing daku nga supplier sa gahum dagitab sa Bohol mao ang GN Power gitukod isip PMR Holdings ug niadtong 2005, miugmad kini sa planta sa elektrisidad nga minggamit sa uling isip sugnod.
Daghan pa nga mga Bol-anon nga nagtuo nga ang koryente nga ming-abut sa Bohol, tanan gikan sa geothermal nga planta sa Leyte, nga mas barato kayo kon itandi sa koryente nga gikan sa ubang tinubdan.
Apan, dala sa wala na gani mokatunga sa panginahanglan sa Bohol ang gitubag sa limpyo nga enerhiya gikan sa geothermal, nagpasabut lamang kini nga kadaghanan sa kortente nga mingsulod sa Bohol, dili gikan sa limpyo nga tinubdan. (RAHC/PIA-7/Bohol)
