Gisugdan na sa telco giant Globe ang temporaryong blocking sa tanang text messages nga adunay clickable Uniform Resource Locators (URLs) ug website links sa tinguha nga mahunong ang text scams.
Sa usa ka pamahayag, ang Globe Telecom niingon nga ang blocking naglakip sa mga mensahe gikan sa tanang network, prepaid o postpaid nga mga numero.
Matod pa niini nga ipatuman kini samtang wala pa mapasar ug napatuman ang SIM Registration Bill, nga giaprobahan sa duha ka Balay sa Kongreso niadtong Miyerkules, Septiyembre 28, ug gipaabot nga ipasa ngadto kang Presidente Ferdinand “Bongbong” Marcos Jr.
“Before implementing this measure, what we were doing was blocking access to malicious links in text messages to help protect customers. This time around, we’re blocking the actual message. If the SMS has a link of any kind, we are not going to deliver it, period. This is necessary to protect our customers,” matod ni Globe Chief Information Security Officer Anton Bonifacio.
Sa sayo pa, ang National Telecommunications Commission (NTC) nipagawas og memorandum nga nagmando sa mga telecommunication firms sa nasud nga i-deactivate ang clickable URLs, links, ug quick response (QR) codes sa text messages taliwala sa pagdagsang sa spam ug phishing text messages.
Sa pagkakaron, gi-block sa Globe ang 784 ka milyon nga mga mensahe nga scam ug spam gikan sa Enero hangtod sa katapusan sa Hulyo 2022.
Gi-deactivate usab niini ang 14,058 ka mga numero sa mobile nga nalambigit sa scam ug gi-blacklist ang 8,973 pa sulod sa samang panahon.
Giingon niini nga migasto kini og $20 milyon o mga P1.1 bilyon nga capital expenditures hangtod karon aron mapausbaw ang kapabilidad niini sa pag-ila ug pagbabag sa mga mensahe sa scam ug spam gikan sa internasyonal ug lokal nga mga tinubdan, lakip ang app-to-person ug person-to-person SMS.
Sa laing bahin, ang kompanya nipadayag og suporta sa SIM Registration Bill kay nagtimaan nga kini makapalig-on sa kapasidad sa gobyerno sa pagdakop sa mga kriminal nga nalambigit sa mga krimen nga nahimo pinaagi sa mga mobile phone.
Giingon niini nga nakigtambayayong kini sa mga magbabalaod aron masiguro ang kredibilidad sa sistema.
“We are taking this measure for the security of our 92 million customers at Globe and 66 million more using GCash, as we note how the modus operandi of fraudsters is becoming even more sophisticated. We hope this will make a major dent on various spam and scam SMS rackets,” matod ni Bonifacio.
