Sitwasyon sa foot bridge sa Sto. Rosario sa lungsod sa Antequera nga giguba sa baha niadtong Valentines Day, gikabalak-an human padayong gi-agian sa mga estudyante aron makatabok sa suba paingon sa ilang tunghaan.
Sa hulagway ug video nga gipadala sa usa ka nagpakabana nga lomulopyo piaagi sa FaceBook ngadto kang konsehal Jhonny “Sniper” Coquilla sa lungsod sa Antequera, makita nga luoy kaayo ug delikado nga madisgrasya ang mga estudyante nga motabok ug dili na kini luwas nga kaagian gumikan kay gamay nalang ang nag gunit sa maong foot bridge.
Matod ni konsehal Coquilla nga nagkinahanglan kini og dinaliang action sa lokal nga kagamhanan sa Antequera.
Dugang niya nga iya usab kining gipadangat ngadto sa Sangguniang Bayan aron maaksiyonan kini sa labing dali nga panahon.
Matod pa naguba kining maong foot bridge nga nagdugtong sa Sto. Rosario, Antequera ug Busao, Maribojoc human sa kusog nga uwan nga mibundak sa probinsya sa Bohol niadtong Pebrero 14.
Ang mga estudyante gikan sa barangay Sto. Rosario nga motabok niining maong footbridge nagtungha sa Busao National High School sa lungsod sa Maribojoc.
Matod ni konsehal Coquilla nga karong adlawa, Lunes atol sa regular session sa Sangguniang Bayan , ipatawag si Engr Hayo Lanzaderas, ang MPDC chairman sa Lungsod sa Antequera aron mahisgotan ang mga plano aron mapadali ang pagtukod pagbalik sa maong foot bridge.
Pipila ka oras human niini nga post makita ang comment ni gobernador Aris Aumentado ug nangutana kung asa ni dapita para mahatagan og paspas nga aksyon. Matod sa mga nagsuporta sa gobernador nga dinhi makita kon unsa ka dako ang gugma sa gobernador sa mga katawhang Bol-anon.
