Ang dayag nga pag-abante sa usa ka nasud ilabina sa lalawigang Bol-anon makita ug masinati diha sa maayong kahimtang o barug sa kinabuhi sa mga mag-uuma, kinsa giilang pinaka-pobre o pinakaluoy nga sektor sa katilingban. |
Si Gob. Aris Aumentado nakahibawo kon unsa kalisod ang kinabuhi sa mga mag-uuma ilabina duol ang iyang kasing-kasing sa masa.
Butang nga mas iyang nasinati sa iyang pagsakay sa usa ka rice harvester sa niaging adlaw atol sa Techno Demo sa Farmers’ Field Day and Harvest Festival didto sa barangay Gabi sa Ubay.
Iyang gipaambit ang maong kasinatian pinaagi sa iyang official Facebook page.
“Di man jud diay lalim ang kinabuhi sa usa ka mag-uuma. Mao na nga ang akong kasing-kasing galantaw gayod sa panginabuhian para nila ug atong gipangitaan ug pamaagi nga mahatagan pod sila ug kahayahay sa kinabuhi,” matud sa anak nga Aumentado.
“Aron marealize ang atong mga damgo para sa food security sa atong probinsiya, subay sa mando sa atong presidente Bongbong Marcos nga focusan ang produksyon sa local products, mohimo kita ug executive order para pangusgan ug pakadak-an ang atong mga local products ug ang gobyerno motabang sa pagpangita ug market para sa ilang mga produkto,” dugang ni Gob. Aris.
“Kung kita adunay gugma para sa mga mag-uuma, sigurado gayod sa bunga sa ilang kahago makatigayon ta,” panapos sa ika-27 nga gobernador sa mga Bol-anon.
Haum ang plano ni Aris nga pangusgan ug pakadak-an ang pagsuporta sa mga lokal nga produkto pinaagi sa paghimo og usa ka executive order.
Ang seguridad sa pagkaon mao gayud unta ang unahon sa mga lider sa katawhan ilabina diha sa matag lungsod.
Hinaot magmalampuson ang maong lakang, kay ang dakong makapahimulos niini dili lang ang mga kabus nga mag-uuma lakip na ang usa ka kakha-tuka nga kaigsoonan nga nag-antos sa kamahal sa mga pamaliton.
Bubuan og ayo sa suporta ang agrikultura aron mas molambo ug tinud-anay nga mo-abante gayud ang Bohol.
