Nipasayaw-sayaw si Trae Young sa iyang iskor nga 15 sa iyang 26 puntos sa unang kwarter ug ang Atlanta Hawks nakadagit sa 104-95 nga kadaugan batok sa bisita nga Philadelphia 76ers kaniadtong Huwebes.
Si Young nakahimo lang og 7 sa 21 niini ka field goals ug 2 lang sa 8 ka itsa sa tres, apan perpekto sa iyang 10 ka free throws ug anaay 7 ka assists.
Ang Atlanta nidaug sa 4 sa ilang niaging 5 ka duwa ug nakatala og 3-1 sa ilang balwarte.
Samtang ang Sixers napildi sa 3 sa niaging 4 ka mga duwa. Ang maong mga pundok moduwa og balik karong adlawa sa Philadelphia.
Ang Hawks ni-iskor og sobra 100 puntos sa ilang unang 12 ka mga duwa ug nakaigo sa ‘century mark’ sa 33 ka sunod-sunod nga regular-season nga mga sangka.
Si Atlanta center Clint Capela nidugang og 18 puntos ug usa ka season-high nga 20 ka rebounds. Si De’Andre Hunter nipuntos og 14 alang sa Hawks.
Gidala ni Joel Embiid ang Philadelphia sa iyang 26 puntos ug 13 ka rebounds. Nidugang si Tyrese Maxey og 15 puntos ug si Tobias Harris nipasulod og 12 puntos.
Ang Hawks ni-iskor og 11 puntos sa unang kwarter aron makahimo sa labaw nga 29-20 sa ikaduhang kwarter.
Sa katapusan, ang Hawks maoy nipatigbabaw.
