Mao na ba ni ang sugod sa huwes de kutsilyo?
Mitumaw kining maong pangutana tungod sa kalit apan sunod-sunod nga taho mahitungod sa duha ka dagkung opisyal ubos sa administrasyong Marcos. Adlawng Martes gibalita ang pagtangtang kang Bureau of Internal Revenue Commissioner Lilia Guillermo ug ang pagsuspenso kang National Irrigation Administrator Benny Antiporda.
Si Guillermo gipulihan ni manlalaban Romeo Lumagui Jr. wa ray unom ka bulan sukad gitudlo nga mangulo sa ahensya nga gitahasan sa pagpangolekta ug buhis. Wa pa nganli sa Palasyo kon kinsa mohulip kang Antiporda human kini gisuspenso ug unom ka bulan sa Ombudsman.
Ang duha nga gipulihan matud pa tungod kay di kini maoy gusto sa mga gamhanan ning bag-ong administrasyon. Sa klaro nga pagkasulti, pareho silang giisip nga tawo ni kanhi Executive Secretary Victor Rodriguez kinsa nikanaug inubanan sa intriga ug kaguliyang.
Gawas sa duha, duna pay ubang mga tinudlo si Rodriguez sa ubang mga ahensya hinungdan nga mitumaw ang pagduda nga di sila Maoy katapusan. Gani, mas gidudahan nga sinugdanan kini sa gitawag ug huwes de kutsilyo sa tanang may kalambigitan kang Rodriguez. (Ang juez de cuchillo [judge of the knife sa iningles] mahimong sabton nga pagpanghinlo nga way pasayloon o palabyon.)
Lahi pa nga hisgutanan ang padayon nga paglutos sa suspendido nga hepe sa Bureau of Corrections nga si Undersecretary Gerald Bantag kinsa Maoy gitudlo nga utok sa pagpatay sa magsisibya nga si Percy Mabanta o mas nailhan nga si Percy Lapid. Hugot kining gipanghimakak ni Bantag kinsa misumbalik og pasangil kang Kalihim Crispin Remulla.
Sa mga intrigador sa pulitika, lain na usab kini nga pagpamatuod sa nagpadayon nga panagbangi sa managlahi nga mga pundok sud sa administrasyong Marcos. Si Rodriguez una nang naghupot sa gamhanang katungdanan nga gikaibgan sa matag administrasyon. Apan siya usab maoy kinadak-ang ulo nga napuwak sa nagbinirahay nga mga pwersa.
Kinsa kahay mosunod? Kini ang pangutana nga anaa sa huna-huna sa mga tigpaniid sa pulitika. Daghang mga ngalan ang gihugon-hugon apan unya na gyud ni matinuod kon pirmahan na ni Presidente Ferdinand Marcos Jr. ang papeles sa mopuli kanila.
Sa pikas bahin, nagpasidaan si Rodriguez nga molibot sa nasud alang sa gitakda nga mga tigum alang kaniya. Wa pa niya isulti og unsay tuyo niining maong mga pakigpulong apan murag di na lisud tagna-on nga suwayan niyang limpyo ang iyang ngalan. Nunot niini, anaa ang pagduda nga duna usab siyay mga isyu nga ibulgar batok sa mga tawo nga maoy nakaingon sa pagpalagpot kaniya.
Ug sa drama pa sa radyo, ayawg sipyata ang sunod nga yugto ning maong tulomanon.
