Gisaulog sa Candijay ang ika-168 nga kasumaran sa pagkamugna niini isip lungsod niadtong Nov. 29, sa Candijay Municipal Gymnasium sa lungsod sa Candijay.
Si Mayor Thamar Olaivar ug Bise Mayor Christopher Tutor ang nangulo sa kasaulogan nga gitambungan nila ni Congresswoman Alexie Tutor, Bokal Greg Jala, mga opisyal ug kawani sa LGU ug barangay ug mga nagkalain-laing ahensiya sa kagamhanan.
Human sa duha ka tuig nga limitadong panagtapok tungod sa mga istriktong restriksiyon gumikan sa pandemya sa CoViD-19, ang bagang duot sa katawhan mihangop ug midugok sa maong talagsaon nga selebrasyon.
Ang unang adlaw sa kasaulogan niadtong Lunes, gipahinungod sa mga mag-uuma sa lungsod diin gihimo ang pagpang-apod-apod sa mga titulo sa yuta, ug gipahigayon ang Pinoy games o tradisyonal nga mga duwa sa Pilipino.
Gipasundayag usab pinaagi sa video ang “ Exquisite: Candijay 2023 “ diin gipakita ang mga plano sa lungsod alang sa sunod tuig.
Mapasalamaton si Mayor Olaivar sa mga katawhan sa lungsod sa mainiton nga pagduyog sa selebrasyon.
Ang unang hugna sa programa sa adlaw sa kasaulogan mao ang pagpahigayon sa usa ka santos nga misa sa Parokya ni Senyor San Jose, gisundan sa church mass wedding ug parada.
Mihatag sa ilang mga pamulong sila si Mayor Olaivar, Bise Mayor Tutor ug kapikas nga si Cong. Alexie, Gobernador Aris Aumentado nga girepresentahan sa iyang pangabaga nga si kanhi Mayor Stephen Rances, ug Bokal Greg Jala.
Mipasundayag usab sa drum and lyre corps ug field demonstration ang mga tunghaan sa Candijay.
Ang selebrasyon gitapos sa gabii pinaagi sa usa ka nindot nga fireworks display, disco concert ug live band sa Leprechaun band, Iping Amores, Crewcrocs ug Missing Felimon.
Ang gustong ipakita sa lokal nga kagamhanan sa Candijay sa maong selebrasyon mao ang kamatuoran uban sa maayong liderato ug aktibong pakigtambayayong sa komunidad, ang Candijay malampuson gihapon nga nakaabante bisan pa sa pandemya ug kalamidad.
Sa niaging tuig nga selebrasyon, ang kapikas sa kinabuhi ni Mayor Thamar nga si Trygve Olaivar gipasidunggan tungod sa iyang natampo sa kinatibuk-ang kausaban sa kahimtang sa lungsod gikan sa miaging siyam ka tuig nga pagdumala ni kanhi mayor Christopher Tutor.
Ang daghang mga kalamboan nga nahimo ni kanhi Mayor Tutor sulod sa iyang tulo ka termino nga pagpangalagad isip hepe ehekutibo sa lungsod, ug gisuportahan sa iyang asawa nga si Congw. Alexie alang sa infrastructural ug socio-cultural development sa lungsod, gipadayon karon ni Mayor Thamar. (rvo/RT)
