Dili ikalalis nga daghang kausaban sa Kapitolyo karon nga si Gob. Aris Aumentado na ang naglingkod isip amahan sa probinsya. |
Ang pagkatukod sa OGAR, pagsulod sa mga dagkong negosyante gikan sa kaulohan, ang pagsugod na og lambo sa turismo ug daghan pa maoy buhing-saksi niini.
Ang nihapak nga mga pagsulay sa probinsya maoy nagpakita o nisukod sa kon unsa ang klase ug kapasidad sa mga niaging kadagkuan sa opisyales dinhi — wala nakita nga ni-uswag gayud ang Bohol.
Bisan ang katawhan mismo niuyon nga dili lang kuno alegasyon nga anaay korapsyon nga nahitabo sa niaging administrasyon.
Ebidensya niana ang pagkalagpot sa niaging namunoan, sa usa lang ka termino.
Si Aris nga napuno sa pagbiay-biay, maoy nidaug, nagdahili nga kadaugan. Ug karon impresibo kaayo ang gipakitang serbisyo-publiko, base sa mga pagdayeg sa mga Bol-anon.
Kon ang tingog sa katawhang Bol-anon ang kuhaan og base, nakasabot sila sa sitwasyon sa Bohol sa niaging tulo ka tuig.
Ana-a pa’y niingon nga sa pagkahawa sa amahan nga Aumentado isip pinakataas nga lider sa mga Bol-anon, wala na natunong ang mga liderato sa nipuli niini.
Sa ubang kalungsuran usab sa Bohol, anaay mga dagkong ngalan sa politika nga gibuhian na sa katawhan, bisan sa dinagkong kuwarta nga gibuhian niini sa Eleksyon.
Sa tinud-anay nga pag-abante sa lalawigang Bol-anon, kinahanglan nga ipadayon sa katawhan ang pagtangtang sa mga kurakot nga opisyales sa gobyerno, elected man o appointed.
