TAGBILARAN, City- Naka-angkon sa grabeng angol sa ulo ang usa ka barangay kagawad sa dihang nabangga ang gimaneho niini nga motorsiklo sa usa ka punoan sa kahoy didto sa barangay Booy ning siyudad kagabii.
Ang biktima giila nga si Cogon barangay Kagawad Erwin Lumotos hingkod ang pangidaron lumulupyo sa Brgy. Cogon.
Basi sa taho sa Tagbilaran City Police Office (TCPO) sa Traffic Division pinaagi kang P/Ssg Rodolfo Sanchez ang duty traffic investigator, pasado alas 9:10 kagabii nadawat nila ang impormasyon kabahin sa hitabo.
Ang mga tinugyanan sa TARSIER 117 kinsa dali nakatubag sa alarma ang midala sa biktima ngadto sa tambalanan sa Ramiro Community Hospital alang sa dinaliang pag atiman sa mga doctor.
Sa gihimong pakisusi sa Traffic investigator sa kauban ni kagawad Lumotos nga matod pa nagmaneho kini sa iyang motorsiklo nga yamaha Nmax gikan sa brgy. Manga apan sa paghidangat sa Purok 1, sa Brgy. Booy giingong nakatagpilaw ug aksidenti kining mibanga sa punoan sa kahoy.
Sa ulahing nakuha nga impormasyon sa BBDN gikan sa kauban nga barangay kagawad, giingong anaa na sa stable si kagawad Lumotos apan ipailawom kini sa operasyon tungod sa mga grabing angol nga nahiaguman. (CLC)
